la scèno - Université de Provence

MARGARIDO
Voui! n’i’a uno de voste nebout, paire; es aqui sus la taulo, se voulès la legi?
TOUPINÈL
Te crese, que vole la legi. Vejan ço que comto noste vitriè.
LOU FATOU
(entendu):
Vitrier: çasseur alpin des Alpes.
Ses pas un... foutrau!
TOUPINÈL
(vèn s’asseta sus l’endavans de la scèno,
estripo l’envelopo de la letro e se mes à legi fort):
«MOUN BRAVE OUNCLET,
«MA BELLO COUSINETO,
«Mete la man à la ploumo per vous faire assaupre quaucos bonos nouvellos.
«La proumièiro es que davans-aièr en furgant au fin-founs de moun sac, ié
retrouvère, sans lou cerca, lou parapluèjo de l’escouado. Crese que serés countents
d’hou saupre, per fin, subre-tout, qu’aurés ansindo pas pus à me manda lous dous escuts
que m’envouiavias chasque mes per croumpa un autre parapluèjo...
LOU FATOU
Ah! bèn, présemple! voilà-t’un soldat comme il s’en rencontre pas foçe.
MARGARIDO
Encaro un qu’es de la famiho das Toupinèls.
TOUPINÈL
(countúnio de legi).
« …Uno autro nouvello que, pense, vous fara aussi plesi, es que, se sièi adeja
souldat de segoundo classo — amai vous hou aguèsse pas jamai escri, estent qu’aime
pas de me vanta, — vau passa souldat de proumièiro, s’hou m’a afourti l’ajudant que
brosse, quand i’aura uno plaço de libro dins lou cors d’armado!».
LOU FATOU
Boufre! Voilà-t-un ome qu’il s’en sortira pas, de son service, à moins du grade
de commandant-major.