commentariüs in epistolam pauli ad corinthios il - Archive ouverte ...

663 SERMONS 664
Iesus Christ ne peut estre nostre iustice, sinon que
nous cerchions la remission de nos péchez au sacrifice
de sa mort: et puis que nous soyons certains
que Dieu est nostre Père, afin que nous le puissions
invoquer en repos de conscience, d'autant
qu'il nous a adoptez en nostre Seigneur Iesus
Christ. Vray est que les séducteurs qui avoyent
abusé les Galatiens vouloyent bien que Iesus Christ
fust cognu et appelé sauveur du monde. Et ils
mesloyent tellement la Loy avec l'Evangile, que
Iesus Christ retenoit tousiours ses titres: mais il
y avoit un partage, qu'il faloit mériter, et que
Dieu par ce moyen estoit appaisé, comme s'ils
eussent dit que Iesus Christ suppleoit au deffaut:
mais en sorte que les poures consciences estoyent
tousiours en trouble. Autant en est-il auiourd'huy
en la Papauté: et le Pape avec toute la racaille
de son Clergé ne diffère en rien d'avec ces séducteurs
contre lesquels sainct Paul combat ici, sinon
d'autant que sous ombre de l'authorité de la Loy
de Moyse ils mettoyent leurs inventions en avant
et les vouloyent faire valoir. Ceux donc contre
lesquels S. Paul dispute, disoyent, il faut garder
la Circoncision: il est nécessaire que nous soyons
circoncis. Et pourquoy? à fin que nous puissions
nous acquitter envers Dieu, à fin qu'ayans fait
nostre devoir, nous soyons acceptez de luy. Et
de quoy donc servira Iesus Christ? Il servira de
quelque supplement: car il n'est pas inutile du
tout: mais après que les hommes se seront ainsi
acquittez et absous, s'il y a quelque deffaut, Iesus
Christ y suppléera.
Voilà comme parloyent les séducteurs qui
estoyent les parties adverses de sainct Paul. Et
le Pape, quoy? il dit qu'au lieu de la Loy ceremoniale
de Moyse, il faut observer ce qu'il ordonne,
et ce qui est déterminé ou par les Conciles,
ou par cestui-ci, ou par cestui-là: et que cela
oblige sur peine de péché mortel: que si nous
avons offensé Dieu, il nous faut racheter par satisfactions,
et non pas en ce qui nous est commandé
de Dieu. Car la satisfaction que nous obtenons,
n'est pas de ce qui est ordonné en la Loy: mais
nous adioustons outre plus du superabondant: et
voilà comme nous sommes acquittez envers Dieu,
et faut que Dieu accepte cela. Nous voyons donc
que le Pape retient ce fondement diabolique, que
ceux-ci avoyent tasché d'introduire. Et c'est encores
une chose pire, qu'au lieu que ceux-ci mettoyent
en avant la Loy de Moyse qui devoit avoir
quelque authorité, le Pape ameine ses propres inventions,
et ce qu'il a forgé en son cerveau. Or ;
sainct Paul au contraire dit que Iesus Christ ne
profite rien, quand nous voulons entrer en telle
paction avec Dieu. Et pourquoy? car c'est tout
Un de partir Iesus Christ et de luy attribuer à
demi ce qui luy appartient du tout et en perfection^
Or il nous est donné pour iustice: il est appelé
nostre paix: et ce mot de iustice qu'emporte-il?
c'est que Dieu nous accepte gratuitement au nom
de nostre Seigneur Iesus Christ. Or maintenant
si nous disons que par nos mérites nous sommes
agréables à Dieu, et s'il y a quelque deffaut que
Iesus Christ y supplie, n'est-ce pas deschirer Iesus
Christ et le desmembrer, en tant qu'en nous est?
Or cela ne se peut faire ne souffrir. D'avantage
nostre Seigneur Iesus Christ nous est donné pour
satisfaction: car il n'y a autre moyen de nous appointer
avec Dieu, sinon que nous cognoissions que
nous sommes acquittez du tout et affranchiz de
l'obligation de mort éternelle. Car si nous pensons
nous racheter par nos mérites, et dire que le reste
qui deffaut nous viendra de luy, comme une petite
portion, c'est pleinement se mocquer, et cela encores
est insupportable.
Nous voyons donc pourquoy sainct Paul declare
que Iesus Christ ne profitera rien: c'est à
fin que les hommes ne s'abusent point en se forgeant
un Iesus Christ qui face son office à demi:
car il nous le faut recevoir tel qu'il nous a esté donné
de Dieu son Père. Or il nous est donné à ceste
condition qu'estans despouillez de toute fiance nous
ayons nostre recours à luy. Et au reste qu'il nous
suffice de l'avoir pour nostre chef, à telle condition
que nous servions à Dieu son Père, luy offrans
tout ce que nous avons, voire sçachans que cela
n'est rien, mais quoy qu'il en soit, qu'il ne laisse
pas d'estre approuvé, pour ce que ceste adoption
qui precede et qui est fondée en nostre Seigneur
Iesus Christ fait que nous et nos oeuvres sont
tousiours acceptées de Dieu: nous (di-ie) qui ne
valons rien, et nos oeuvres qui ne sont que menus
fatras, que toutesfois Dieu a le tout pour agréable,
d'autant qu'il ne regarde pas ce que nous sommes
ou ce que-nous faisons, ni la qualité ou la mesure
de nos oeuvres: mais il regarde que nous venions
à luy comme membres de son fils unique, estans
appuyez du tout sur le sacrifice par lequel nous
avons esté rachetez.
Et voilà pourquoy sainct Paul pour plus ample
confirmation adiouste, qu'il proteste et testifie que celuy
qui est circoncis est deteur de faire toute la Loy,
car (dit-il) Iesus Christ est inutile quand on se veut
iustifier par ce moyen. Nous avons declaration assez
liquide et facile de ce que sainct Paul avoit dit : et
nous la faut bien noter, pour ce qu'il est difficile
de persuader aux hommes que Iesus Christ soit
inutile du tout, quand ils le veulent faire inutile
en partie. Car combien que les Turcs et les autres
Payens n'ayent iamais cognu que c'estoit de Iesus
Christ, si est-ce qu'il ont eu une opinion du tout
semblable que les Papistes, et trouvera-on une con-