commentariüs in epistolam pauli ad corinthios il - Archive ouverte ...

659 SERMONS 660
point défendues par la bouche de Dieu. Or encores
ne suffît-il pas que nous ayons la parole de Dieu
pour nostre conduite, sans y mesler rien qui soit:
mais il nous faut quant et quant sçavoir, comme
i'ay desia touché, que Dieu accepte nostre affection,
quand il void que nous luy voulons estre obeissans,
encore qu'il y ait beaucoup à redire, qu'il y ait
des infirmitez tant et plus, et que nous venions
à luy comme en clochant, que tout ce que nous
faisons ne soit que menus fatras, quand il le vöudroit
examiner à la rigueur, neantmoins qu'il
accepte le tout. Et pourquoy ? car il nous supporte
comme un père ses enfans. Voilà donc la liberté
en laquelle il nous faut estre maintenus, sinon que
nous vueillions estre séparez de nostre Seigneur
Iesus Christ. Et pourquoy ? Car si nous ne sommes
résolus, comme i'ay desia dit, que Dieu nous aime,
encores que nous en soyons indignes, et que cela
se fait d'autant que nos péchez sont ensevelis par
la mort et passion de nostre Seigneur Iesus Christ,
que sera-ce? Iesus Christ de quoy nous profiterail
alors? et puis quand nous sommes en doute et
en inquietude, pour sçavoir si Dieu a nostre service
agréable: et puis s'il faut garder ceci ou cela comme
les hommes le veulent: si donc nous sommes ainsi
entortillez en tant de disputes, nous ne aurons
iamais repos.
Et ce n'est point sans cause que sainct Paul
après avoir exhorté que les fidèles demeurent en
ceste liberté qui leur a esté si chèrement acquise,
il adiouste que Iesus Christ ne leur profitera rien,
sinon qu'ils cognoissent ce qu'il leur a acquis, et
qu'ils ne s'en laissent point despouiller en façon que
ce soit par les hommes. Or ici nous voyons que
ceste liberté dont S. Paul parle, n'est pas pour
nous donner une licence de faire ce que bon nous
semblera: comme s'il nous mettoit la bride sur le
col: et il protestera aussi en son lieu. Il ne pretend
donc à autre fin, sinon que nous puissions
servir paisiblement à Dieu sans regret, sans contrainte,
et aussi sans estre gehennez continuellement
de beaucoup de disputes et de scrupules,
comme nous voyons que les incrédules en sont là:
c'est à sçavoir ceux qui n'ont point leur fiance du
tout appuyée en nostre Seigneur Iesus Christ.
Nous avons donc (outre ce qui a esté dit) à noter
quelle est la fin de ceste liberté, c'est que nous
puissions estre comme aleigres et paisibles devant
Dieu: car si nous n'avons cela, il est certain que
iamais nous ne prendrons courage de luy obéir, et
puis nous serons tousiours en trouble, et ne le
pourrons invoquer, qui est le principal service qu'il
demande et qu'il approuve. Nous voyons donc
qu'ici il est question du principal poinct de nostre
salut, quand il sera bien entendu. Les Papistes
auiourd'huy, quand nous parlons de la liberté
Chrestienne, disent que nous ne prétendons que
d'abolir toutes ordonnances et traditions de l'Eglise,
et que ce nous est tout un moyennant qu'un chacun
vive à son appétit, qu'on mange chair tous les iours
sans difficulté, que toutes choses semblables soyent
mesprisees: mais c'est d'autant que iamais n'ont
cognu qu'on ne peut obéir à Dieu, sinon d'une
franche volonté. Car qu'on face examen de tous
les Papistes, tant qu'il y en a, et des plus dévots,
il est certain qu'ils rongent leur frein, quand ils
se tormentent et qu'ils travaillent beaucoup pour
servir à Dieu: car tout ce qu'ils font n'est que par
despit: et s'il leur estoit possible de s'en exempter,
ils le feroyent très volontiers. Au reste quand ils
ont ainsi tracassé en leurs folles devotions, ils se
font accroire que Dieu se doit contenter de cela:
mais si on leur remonstre qu'ils ne peuvent rien
faire qui soit accepté de Dieu, et cependant, encores
que leurs oeuvres fussent bonnes, qu'elles ne
méritent rien devant luy, alors qu'on leur verra
desgorger leur venin (comme ils font), qu'ils blasphèment
à l'encontre de Dieu, sinon qu'on leur
face accroire que par leurs mérites ils font merveilles.
Quoy qu'il en soit, iamais ne peuvent
cognoistre et ne peuvent gouster que c'est d'obéir
à Dieu. Et pourquoy? car ils n'entendent pas que
c'est d'estre paisibles: c'est à sçavoir qu'ils offrent
à Dieu d'un franc courage ce qu'ils font, et qu'ils
sçachent que cela est accepté de luy, voire d'autant
qu'il les traitte humainement et les supporte comme
ses enfans. Les Papistes ne cognoissent point cela:
il ne se faut donc point esbahir s'ils trouvent si
estrange que nous combations pour ceste liberté,
car ils ne sçavent que c'est. Or tant y a que ceci
n'est point dit sans cause de sainct Paul: et par
ces mots nous voyons combien ceste liberté est
précieuse, et que ce n'est pas une chose à mespriser.
Car Iesus Christ ne s'est pas ioué en sa
mort et passion, quand il s'est offert à Dieu son
Père, c'a esté pour faire un ouvrage qui surmonte
en excellence et dignité la creation du ciel et de
la terre.
Or si ainsi est que S. Paul ameine ceste liberté
pour~un fruict excellent qui nous a esté acquis par
la mort et passion de nostre Seigneur Iesus Christ,
il faut bien que ce soit une chose haute et précieuse
que ceste liberté dont il parle. Et pour
comprendre quelle est sa nature et vertu, il faut
que nous apprenions de nous recueillir à Dieu,
quand on nous en parle. Exemple: si on nous
impose quelques loix ou nécessité de faire telle
chose, et bien, quant aux hommes cela n'empesche
pas que nous ne soyons libres devant Dieu : car ce
qui est de la police on le défendra ou commandera,
pour ce que cela tourneroit au dommage commun,
ou bien que telle chose soit requise, et qu'il faut