commentariüs in epistolam pauli ad corinthios il - Archive ouverte ...

601 SUR L'EPITRE AUX GALATES. 602
me voici. Voilà Dieu qui magnifie sa grace, à
fin que les hommes ne soyent pas si outreouidez
de penser qu'ils soyent parvenus à la foy par
leur sagesse. Non, dit-il, vous estiez tous en voye
de perdition, et n'y a celuy que ie n'aye attiré à
moy, comme ayant pitié de vostre misère en laquelle
vous estiez plongez: ie me suis donc manifesté:
mais le tout est de ma pure grace: car
iamaia vous ne m'eussiez cercbé: qui plus est, il
n'y a celui qui ne s'eslongnast de plus en plus:
car nous sommes non seulement comme bestes
errantes: mais comme bestes sauvages et farouches:
nous sommes du tout adonnez à rebellion iusques
à ce que Dieu nous ait apprivoisez: et qu'il nous
ait changez pour estre brebis de son estable, et
pour faire office de Pasteur envers nous. Ainsi
donc ce n'est point sans cause que sainct Paul
corrige ce mot quand il dit vous avez [cognu Dieu:
mais plustost (dit-il) vous avez esté cognu de luy,
comme s'il disoit que quand nous sommes parvenus
à la cognoissance de l'Evangile, il ne faut
pas que nous cuidions mieux valoir que les autres:
mais que nous sçachions que Dieu nous a prévenus,
et que nous fussions péris cent fois plustost en
nostre bestise, que de venir à quelque bonne correction,
si Dieu ne nous eust du tout changez.
Or maintenant nous voyons que peut le franc
arbitre, duquel les poures ignorans se glorifient
pour obscurcir la grace de Dieu. Il est vray que
tous confesseront qu'ils ne peuvent pas estre
illuminez que Dieu n'y besongne: mais puis après
ils restraignent cela, disans, que ce n'est qu'en
partie, et leur semble qu'un chacun y apporte du
sien. Or tout cela est ici exclud quand il est dit
qu'il n'y a que Dieu seul qui nous cognoisse et
qui nous marque, à fin de se declarer à nous et
de nous faire approcher de luy. En general donc
cognoissons que ce n'est point par nostre dignité
que nous ayons obtenu ce bien que l'Evangile
nous soit purement presche, et qu'un chacun
applicque ceci à sa personne: car si ie cuide
avoir ie ne sçay quoy en moy pour estre préféré
ni à cestui-ci, ni a cestui-là, c'est comme ravir la
louange de Dieu pour me l'usurper. Or ce
sacrilege là est insupportable: il nous faut donc
revenir à ce que dit sainct Paul en l'autre passage,
Et qui est celuy qui te fait excellent? Il parle à
ceux qui se prisoyent, estimans avoir en eux quelque
vertu et quelque excollence: comme de fait les
Corinthiens avoyent des dons spirituels qui pouvoyent
estre en reputation entre les hommes.
Sainct Paul leur accorde assez qu'ils ont de
grandes graces, et qui sont dignes d'estre prisées:
mais il leur demande dont leur vient tout cela, et
s'ils l'ont acquis, si personne d'eux s'en est rendu
capable? Il est bien certain que non. Apprenons
donc qu'il ne suffirait pas que la parole de Dieu
nous fust preschee, sinon que Dieu besongnast en
nous par son S. Esprit, comme l'expérience le
monstre, qu'il n'est pas donné à tous. Et qui plus
est, encores iamais nul ne s'avisera de cercher la
bonne pasture, sinon qu'elle luy soit offerte du
costé de Dieu. Ostons donc toute folle imagination
de nostre teste, et soyons despouillez de tout
orgueil: ne pensons point estre plus habiles que
les autres, d'autant que nous avons cognu l'Evangile:
mais attribuons ceste louange là à nostre
Dieu, que du temps que nous luy tournions le dos,
que nous estions comme abysmez cent mille fois
en perdition, il nous a regardez et nous a réduits à
soy, à fin que quand on nous dit que nous sommes
iustifiez par foy, que nous obtenons salut, que nous
sçachions que cela vient de pure grace, et que la
foy nous est donnée, d'autant que nous ne la pouvons
pas acquérir, et confessons avec la poure
Agar que nous avons veu celuy qui nous avoit
regardé auparavant. Car là nous avons un miroir
de tout le genre humain. Ceste poure femme-là
est en grande tristesse, abandonnée de chacun, et
ne sçait où elle doit aller: mais Dieu a pitié
d'elle, et la visite au desert. Là dessus elle confesse
que Dieu l'a regardée devant qu'elle pensast
à luy. Ainsi donc que nous soyons retenus en
crainte et humilité, voyans que la source et le
principe de nostre salut c'est que Dieu nous a
recognus et marquez du temps qu'il ne nous
challoit de luy, et qu'outre l'ignorance, il y avoit
un mespris et une telle brutalité, qu'un chacun
eust cerché sa ruine et perdition, sinon que nous
eussions esté retirez par sa bonté infinie. Voilà en
somme ce que nous avons à observer.
Or cependant pratiquons la remonstrance qui
est ici contenue: c'est puis que Dieu nous a
appelez à la pure cognoissance de son Evangile,
que nous persistions à cheminer constamment
selon la voye qu'il nous propose, comme nous le
cognoissons la fontaine vive de tous biens, ainsi
qu'il est dit au 2. chap, de Ieremie: si nous allons
donc maintenant fouir des cavernes pertuisees, et
qui ne puissent tenir une goutte d'eau, n'est-ce
pas pleinement renoncer au bien qui nous estoit
mis entre mains? Quand un homme verra la
viande apprestee pour sa nourriture: et sçait qu'il
en peut tirer bonne substance, s'il quitte la table,
et qu'il s'en aille cercher des ordures çà et là et
des puantises, s'il s'en veut paistre, n'est-il pas
digne de s'empoisonner? Ainsi donc en est-il de
tous ceux qui ne se contentent pas de la pure
doctrine de la Loy de Dieu et de son Evangile.
Car voilà la fontaine qui est devant eux, ils y
peuvent boire pour en estre pleinement rassasiez,
comme il est dit au 55. chap. d'Isaie, et au 5. de