commentariüs in epistolam pauli ad corinthios il - Archive ouverte ...

565 SUR L'EPITRE AUX GALATES. 566
gneur Iesus Christ nous est communiqué. Et puis
si nous avons commis tant d'offenses que nous sentions
l'ire de Dieu estre enflammée contre nous,
voilà Iesus Christ qui a offert un sacrifice, par lequel
nous sçavons que l'appointement a esté fait
entre Dieu et nous : puis donc que Dieu nous a tellement
testifié l'amour qu'il nous porte, que nous ne
pouvons douter que tousiours il ne vienne au devant
quand nous le cercherons en vérité de foy:
c'est à dire en une telle rondeur que nous ne doutions
point qu'il nous ait voulu frustrer quand il
s'est monstre si liberal envers nous. Voilà donc
comme il nous faut faire valoir nostre Baptesme :
c'est que nous en usions comme d'un bouclier pour
repousser toutes les defiances qui nous surviennent,
tellement que nous serions empeschez de prier Dieu,
et avoir tout nostre refuge à luy, si ce n'estoit que
nous vinssions à luy. Or il est vray que i'ay en
moy tant de péchez que le nombre seroit pour me
rendre detestable devant mon Dieu: mais ie n'y
vien point aussi comme en ma personne : ie renonce
à moy et ma nature, où il n'y a que honte et confusion:
mais i'y vien au nom de nostre Seigneur
Iesus Christ, et mesmes il va devant moy, il me
donne comme son vestement, il parle pour moy, et
c'est en son nom que ie me présente, comme si
i'estoye luy-mesme, puis qu'il luy a pieu me faire
ceste grace que ie soye uni à luy.
Voilà donc comme il nous faut oublier quels nous
sommes, quand nous venons à Dieu, et faut que nous
prenions la personne de nostre Seigneur Iesus Christ,
voire nous oublier: non pas que nous ne sentions nos
deffauts pour estre vrayement humiliez et nous y
desplaire: mais cependant si faut-il que nous prenions
ceste resolution et certitude que Dieu nous
accepte comme venans à luy en la personne de son
fils unique. Mais il y en a bien peu qui pensent
à cela. Et de fait combien que nous facions tous
profession de l'Evangile, nous en trouverons beaucoup
qui ne sçavent que c'est de l'usage du Baptesme,
ne de quoy il nous profite, ni à quelle fin
il a esté ordonné. Or il coustera bien cher à telles
gens d'avoir receu un tel gage de Dieu: il monstrera
que c'est une chose trop précieuse pour en
abuser, quand il est dit que c'est le moyen par lequel
nous soyons unis à nostre Seigneur Iesus
Christ, et entez en sa mort et resurrection. Quand
donc plusieurs dès leur enfance auront receu le
Baptesme, et auront vescu en ce monde quarante
ou cinquante ans sans sçavoir pourquoy ils ont
esté baptisez, il vaudroit mieux que leurs mères
les eussent avortez et qu'ils fussent abysmez cent
fois en terre, que d'avoir ainsi profané une chose
si saincte. Et ainsi pensons tant mieux à nous, et
que nous apprenions combien qu'on ne nous iette
qu'un peu d'eau sur la teste: toutesfois que ce n'est
pas une figure vaine (car Dieu parle du ciel), Iesus
Christ nous est là tesmoin de l'usage et vertu de
ce Sacrement: mais sur tout que sa mort et resurrection
nous y est ratifiée. Pensons bien à ces
choses, et que nous cognoissions pourquoy nous
sommes baptisez, et quel bien cela nous apporte,
et que cela soit bien enraciné en nos coeurs, et que
toutesfois et quantes qu'on baptise les petis enfans,
nous pensions mieux à nous. Car pourquoy est-ce
que le Baptesme se fait en la compagnie des fidèles?
Il est vray que c'est à fin que l'enfant soit recommandé
à Dieu: et puis c'est comme une bourgeoisie
celeste, qu'il ne faut pas que cela se face
en cacheté: mais c'est un acte qui est si excellent,
qu'il mérite d'estre gardé d'une façon plus authentique
et solennelle que toutes les choses appartenantes
à la police du monde: mais cependant nous
avons là un miroir du bien qui nous a esté desia
communiqué, à fin que nous en iouissions iusques
en la fin. Car nous voyons que les incrédules se
privent et se bannissent par leur ingratitude de
ceste adoption de Dieu. Afin donc que nous y soyons
confermez de plus en plus, nous devons bien
penser quand on célèbre un Baptesme, que cela
nous attouche et que Dieu nous appelé à soy pour
nous monstrer en la personne d'autruy que de nature
nous estions perdus et damnez. Mais d'autant
qu'il nous a unis au corps de nostre Seigneur
Iesus Christ, nous ne sommes plus recognus en
nostre nature, Dieu ne considère pas quels nous
sommes, ne que nous avons mérité: mais il nous
tient comme si Iesus Christ estoit en nous: comme
aussi nous ne devons point estre séparez d'avec
luy. Voilà en somme ce que nous avons à retenir
sur ce passage.
Or là dessus S. Paul conclud qu'il n'y a ni
Grec ne Iuif, il n'y a ne serf ni franc (dit-il), il n'y
a ne masle ni femelle: mais que Iesus Christ est un
en nous tous, et nous tous sommes un en luy. Or
par ceste sentence S. Paul a voulu encores mieux
exprimer que la seule foy nous doit suffire, et qu'il
nous faut exclure tous autres moyens : car ce seroit
deroguer tant à la grace de nostre Seigneur Iesus
Christ, qu'à la vertu de son sainct Esprit. Si on
allègue que la Circoncision a esté tousiours aux
Peres un tesmoignage de ce que nous avons auiourd'huy
au Baptesme, ceste difficulté est solue
au 2. chap, des Colossiens b. 11, où S. Paul dit
que nous sommes circoncis estans baptisez: non
point de main d'homme, ne d'un signe visible,
mais ce nous doit bien estre assez que Dieu nous
recognoisse pour estre participans de la Circoncision
spirituelle, voire d'autant que le Baptesme est
ordonné auiourd'huy à ceste fin là. Or. notons que
la Circoncision a esté pour distinguer ou discerner
entre les Iuifs et les Payons : c'estoit (comme il est
36*