commentariüs in epistolam pauli ad corinthios il - Archive ouverte ...

561 SUR L'EPITRE AUX GALATES. 562
dit) nous n'avons une seule goutte de vie celeste,
sinon celle qu'il nous inspire. Il faut donc que
pour approcher de Dieu, pour estre partioipans de
son sainct Esprit et des dons qui appartiennent à
la vie immortelle, que nous soyons en Iesus Christ,
et que de nous-mesmes nous ne pensions point estre
quelque chose, ni rien valoir. Et voilà aussi pourquoy
en ce passage que i'ay allégué du 17. chapitre
de sainct lean nostre Seigneur Iesus Christ, monstrant
la vraye et parfaite félicité des siens, dit,
Père celeste, ie demande que ceux-ci soyent faits
un avec nous. Voilà donc comme nous sortons de
l'abysme de mort auquel nous sommes plongez, c'est
à sçavoir estans unis à nostre Seigneur Iesus Christ
par le lien de la foy.
Or sainct Paul dit que cela se fait au Baptesme:
non pas que tous ceux qui sont baptisez
soyent à la vérité membres de Iesus Christ. Car
nous voyons tout l'opposite, mesmes il y en a qui
profanent et polluent toute la saincteté de leur
baptesme, qu'ils sont coulpables de sacrilege, pour
autant qu'ils font profession d'estre à Iesus Christ
et cependant le despitent, et sont comme des ordures
et des puantises pour corrompre tout. Le
Baptesme donc ne fait pas que nous soyons tous
Chrestiens: et d'autre costé nous sçavons que c'est
un bien trop grand que d'estre faits fils de Dieu,
pour attribuer cela à un element corruptible. Qu'estce
que l'eau? Dire que l'eau nous régénère tellement,
que nous soyons délivrez de la mort, et
que nous obtenions ceste gloire par laquelle Dieu
nous esleve à soy, cela (di-ie) seroit pervertir tout
ordre.
Mais notons en premier lieu quand sainct Paul
parle ici du Baptesme, qu'il presuppose que nous
y recevions ce qui nous y est présenté. Beaucoup
seront baptisez qui effacent la grace de Dieu: tant
y a qu'elle leur est offerte, mais ils s'en rendent
indignes par leur incrédulité, malice et rebellion.
Voilà donc comme la vertu du Baptesme est anéantie
en plusieurs: mais quand il y a une mélodie et
un accord mutuel entre Dieu et nous, alors le
Baptesme a cest effect, duquel S. Paul traitte et
dispute en ce passage. Voilà donc comme nous
sommes faits enfans de Dieu, et vestons Iesus
Christ, c'est d'autant que Dieu nous retire de la
corruption en laquelle nous estions de nature, et
veut que Iesus Christ soit nostre chef, que nous
soyons entez en luy pour estre participans de tous
ses biens. Quand donc nous acceptons cela, alors
tout ce qui est figuré par le Baptesme s'accomplit.
Si les hypocrites le vantent de leur Baptesme,
sainct Paul monstre que ce n'est que pure vanité
et illusion, en disant que la Circoncision de la lettre
n'est rien: c'est à dire si nous ne regardons que le
Sacrement extérieur et visible: que tout cela n'est
de nulle valeur. Ainsi donc en est-il du Baptesme:
il ne servira point à ceux qui se disent bien de
bouche estre Chrestiens et grans supposts de l'Eglise,
voire s'ils polluent ce que Dieu avoit dédié à un
usage tant excellent, comme desia nous avons dit.
Notons bien donc que S. Paul adresse ceste sentence,
non pas à tous sans exception, qui portent le
signe et la marque au dehors: mais à ceux qui
sçavent faire leur profit du Baptesme.
Au reste pour le second S. Paul n'entend pas
que le Baptesme ait ceste vertu, c'est à dire que
l'eau nous change tellement que nous soyons revestus
de nostre Seigneur Iesus Christ: car Dieu
par ce moyen seroit despouillé de la louange qui
luy est deuë à luy seul. Mais S. Paul monstre ici
le moyen par lequel nous sommes certifiez d'estre
membres du corps de nostre Seigneur Iesus Christ.
I'ay desia dit qu'il ne nous faut point cercher
d'autre cause que la pure bonté de Dieu, car si
nous faisons des circuits ni çà ne là, c'est comme
si un homme avoit bien soif, et qu'il tournast le
dos à la fontaine. Apprenons donc qu'il n'y a que
Dieu seul par sa pure libéralité, qui nous unisse à
nostre Seigneur Iesus Christ, et fait cela par la
vertu secrete de son S. Esprit, mais cependant il
ne laisse pas de besongner par le Baptesme comme
par un instrument inférieur, comme nous voyons
que toute clarté procède de luy, et mesmes devant
qu'il y eust ne soleil ne lune desia la clarté estoit
au monde. Tant y a qu'auiourd'huy Dieu a establi
le soleil par lequel nous sommes esclairez ici bas.
Or le soleil n'est pas pour deroguer à la vertu qui
est en Dieu seul. Apres il est dit que l'homme
ne vit point du pain: mais c'est de la parole qui
procède de la bouche de Dieu. Et de fait le pain
est une chose morte. Qui nous la donne? c'est
Dieu qui nous l'inspire, car nous vivons en luy,
comme sainct Paul en parle au 17. chapitre des
Actes, f. 28. Cependant si est-ce que Dieu s'est
voulu servir du pain, et il l'applique iournellement
à nostre usage à fin que nous en soyons substentez.
Ainsi donc il n'y a nul inconvenient que par le
Baptesme nous ne soyons revestuB de nostre Seigneur
Iesus Christ, et toutesfois que cela ne procede
que de la pure grace de Dieu, et que c'est le
sainct Esprit qui besongne par sa vertu secrete, et
qui surmonte tout ordre de nature: mais le Baptesme
nous certifie de cela, car nous sommes rudes
et terrestres. Il faut donc que Dieu nous attire
petit à petit selon nostre infirmité, à fin de nous
faire comprendre les choses qui sont trop hauteB
pour nous. Car où sont nos ailes pour voler
pardessus les cieux? A grand peine pouvons nous
ramper ici bas sur la terre, il faut donc que Dieu
descende à nous, et il le fait par le moyen des
Sacremens.
Gàlvini opera. Vol. L. 36