commentariüs in epistolam pauli ad corinthios il - Archive ouverte ...

551 SERMONS 552
confits en toute corruption, nenni : mais ici il est
seulement parlé de la confiance, et sur quoy nous
pourrons estre fondez pour appeller Dieu nostre
Père, pour estre certains de l'héritage éternel. Si
nous venons à nos oeuvres (comme il a esté déclaré
cidessus), il n'y aura nulle certitude, et pourquoy?
il ne faut point une oeuvre, ou deux, ou
trois, mais une obéissance parfaite, laquelle ne
s'est iamais trouvée en creature mortelle. Et si
les Anges avoyent à respondre à Dieu, ils ne pourroyent
point satisfaire à ceste perfection de iustice:
tant s'en faut que nous, qui ne sommes que vermine,
et qui beuvons l'iniquité comme le poisson
l'eau (ainsi qu'il est dit en lob), que nous puissions
avoir ce fondement-là, que Dieu nous reçoive, d'autant
que nous en sommes dignes : bref il nous faut
quitter toute confiance de nos oeuvres et confesser
qu'il n'y a en nous que condamnation, si nous desirons
que la promesse soit accomplie en nous. Voilà
donc en somme ce que saiuct Paul a voulu declarer
en ce passage.
Or il adiouste quant et quant que devant que la
foy vint, nous estions gardes sous la loy, estans comme
enclos, iusques à ce que la foy fust révélée. Ici les
mots de Loy ou de Foy auroyent encores quelque
obscurité, sinon qu'ils fussent déclarez plus au long:
car quelque fois quand l'Escriture parle de foy, elle
entend toute religion, et aussi elle comprend tous
les enseignemens qui nous sont donnez en l'Escriture
saincte. Quelque fois elle parle de la certitude
que nous devons avoir quand nous venons invoquer
Dieu, pour ce qu'il ne nous y faut point venir à
l'aventure : mais qu'il nous faut accepter la grace
qu'il nous offre. Quand donc nous embrassons la
promesse de Dieu, pour ce qu'elle ne depend point
de nos mérites, mais qu'elle est gratuite du tout et
liberale, et que nous en sommes faits participans
par nostre Seigneur Iesus Christ, voilà, que c'est
de foy, et comme sainct .Paul l'a prinse iusques
ici. Et aussi en l'Epistre aux Romains et partout
où il dispute et traitte comment nous pouvons estre
iustifiez devant Dieu, ou bien luy estre agréables:
car c'est tout un, comme nous avons dit. Or en
ce passage, il y a encores un sens plus special de
la foy, c'est ceste revelation que nous avons par
l'Evangile: car il est bien certain que les Peres
ont eu l'Esprit de foy, comme nous avons desia dit
qu'Abraham a esté iustifié, pour ce qu'il a creu à
Dieu, et qu'en cela il faut que nous soyons conformes
à son exemple, mesmes que nous soyons
faits ses enfans pour parvenir au royaume des
cieux. La foy donc a eu tousiours sa vigueur, et
n'y a iamais eu autre moyen de conioindre ne unir
les hommes à Dieu, mais tant y a que du temps
d'Abraham, la foy n'estoit pas encores révélée, pour
ce que nostre Seigneur Iesus Christ qui en est le
vray gage et la substance n'estoit pas encores
apparu. Voilà donc comme auiourd'huy nous sommes
iustifiez gratuitement et sans aucun mérite. Et
pourquoy cela? quiconques croit que Iesus Christ
est mort pour nos péchez, et qu'il est ressuscité
pour nostre iustice, il a toute perfection. Or nous
croyons de coeur à iustice (comme il est dit en
l'autre passage) et faisons confession de bouche à
salut. Or maintenant, Abraham eust eu nostre
Seigneur Iesus Christ, comme auiourd'huy il nous
est déclaré, et mesmes qu'il est comme crucifié au
milieu de nous (ainsi que sainct Paul en a parlé
cidevant), sa foy eust esté égale: mais elle estoit
encores comme cachée, c'est à dire, combien qu'Abraham
esperast en Iesus Christ et qu'il attendist
salut de luy : combien qu'il se deffiast de soy
mesme, et qu'il cognust qu'il n'avoit aucune vertu
pour estre approuvé de Dieu, si est-ce toutesfois
qu'encores estoit-il tenu sous ces ombrages, et qu'il
faloit qu'il regardast Iesus Christ de loin, car il
n'estoit pas encores nommé le soleil de iustice ainsi
qu'il en est parlé en Malachie 4 a. 2.
Nous voyons donc maintenant ce que sainct
Paul a entendu, disant que la foy n'estoit point
venue: c'est à dire le temps opportun de telle revelation,
comme elle nous est auiourd'huy donnée en
l'Evangile, que les Peres ont esté enclos sous la
Loy. Il y a donc ici une partie de diversité, et
une partie de similitude: c'est à sçavoir que si on
demande qu'elle a esté la condition des Peres qui
ont vescu sous la Loy, il faut respondre qu'en
partie elle a esté diverse de la nostre, et en partie
toute une. Et comment toute une? Pour ce que
desia Dieu s'estoit déclaré propice à nostre père
Abraham, voire au nom de nostre Seigneur Iesus
Christ, et que luy, ayant cognu la nécessité qu'il
avoit de mettre toute sa fiance en la pure grace
de Dieu, a renoncé à soy-mesme, et ce qu'il a
creu luy a -esté réputé à iustice, comme nous avons
veu. Autant en a il esté de tous les Patriarches
et Prophètes. Ainsi donc leur condition a esté
pareille ou semblable à la nostre, entant qu'ils se
sont fondez sur nostre Seigneur Iesus Christ, et
qu'ils ne se sont glorifiez sinon en la pure miséricorde
de Dieu, et qu'ils ont eu les promesses de
l'héritage de la vie celeste, comme nous, mais il y
a eu diversité d'autant que iusques à la venue de
nostre Seigneur Iesus Christ il a falu qu'ils eussent
les sacrifices et lavemens, et choses semblables: et
quand la Loy a esté donnée, qu'il y eut le sacrificateur
qui entrait au sanctuaire pour moyenner, et
que le peuple fust eslongné de longue distance, et
que le voile fust au milieu pour monstrer une obscurité,
voilà donc comme la condition des Peres
a bien différé de la nostre d'autant qu'en l'absence
de nostre Seigneur Iesus Christ, ils ont eu les