commentariüs in epistolam pauli ad corinthios il - Archive ouverte ...

537 SUR L'EPITRE AUX GALATES. 538
que la promesse de soy fust debile, et qu'elle ne
peust apporter salut aux hommes, et qu'il falust
quelque accessoire: rien de cela (dit sainct Paul),
elle a esté adioustee à fin que les hommes sceussent
que Dieu à bon droit les a tous condamnez, et
qu'ils ne peuvent avoir aucun repos, mais telle inquietude
les tormente, qu'ils sont tousiours en desespoir,
iusques à ce qu'ils soyent arrestez à ceste
promesse. Or si on allègue que desia la promesse
devoit servir de cela, la response et la solution en
est bien aisée: car combien que Dieu se présentant
pour sauveur, nous monstre que nous sommes damnez,
iusques à ce qu'il ait pitié de nous, tant y a
que nous ne pouvons estre aidez comme il appartient
iusques à, ce qu'il nous espouvante. Par sa
promesse il nous convie doucement et comme d'une
façon paternelle. Il est vray que cela nous doit
faire sentir nos misères pour nous y desplaire:
mais nous sommes tant endormis en nos fautes,
que nous n'y pensons point si ce n'est par force.
Apres donc que Dieu a donné la promesse aux
hommes: combien qu'ils eussent occasion de gémir
pour leurs péchez, à fin de se reposer du tout en
la grace de nostre Seigneur Iesus Christ, si est-ce
qu'ils ne l'ont point fait, iusques à ce que Dieu ait
frappé comme à grans coups de marteau, ce qu'il
a fait par sa Loy. Au reste sainct Paul monstre
que par nostre ingratitude nous abusons de l'humanité
de nostre Dieu, d'autant plus qu'il se monstre
bénin envers nous, que nous prenons occasion de
nous flatter. Il faut donc qu'il nous rudoyé, et
qu'il nous declare qui nous sommes à fin de nous
espouvanter, et que par un tel effroy nous soyons
amenez à requérir sa grace à bon escient. Voilà
donc qu'emporte ce mot d'Adiouster: c'est comme
si S. Paul nous accusoit de ce que nous ne pouvons
pas faire nostre profit de la bonté de Dieu,
quand il nous convie à soy doucement, qu'il se
monstre si débonnaire que rien plus, mais que
nous le picquions et quasi contraignons à user de
rigueur, à, fin que par ce moyen nous soyons aba-,
tus, et que ceste humilité nous prepare à cercher
sa grace, laquelle nous trouvons en nostre Seigneur
Iesus Christ, quand nous y sommes disposez.
Or cependant sainct Paul adiouste, que c'a esté
iusques à ce que la semence vint à laquelle la promesse
a esté donnée. Ceci se rapporte proprement
aux ceremonies, ou bien il nous faut prendre la
Loy avec toutes ses qualitez (qu'on dit), toutes ses
circonstances et tous ses accessoires. Si nous prenions
seulement la Loy pour les -dix commandemens,
ce que sainct Paul dit ne seroit pas convenable:
car la Loy doit auiourd'huy avoir ceste
vigueur en nous, c'est qu'elle nous est une reigle
de bien vivre, et qu'elle nous declare la volonté
de Dieu, à fin que nous ne soyons pas en nostre
vie comme gens vagabonds, et que nous ne
courions point à l'aventure: mais que nous ayons
le chemin tout fait. La Loy donc entant
qu'elle nous monstre ce qui est bon, n'a pas esté
temporelle : car elle doit durer iusques à la fin
du monde. Mais il nous faut noter la dispute de
sainct Paul: car il prend la Loy d'autant qu'elle
contient les promesses et les menaces, et puis les
ceremonies. Il y a donc d'un costé, Qui fera ces
choses, il vivra en icelles: comme desia nous avons
veu. Il y a la menace: Maudit sera celuy qui
n'accomplira tout ce qui est ici contenu. Or la
Loy (comme nous voyons) ne promet salut sinon
à, ceux qui aurons vescu purement et en toute
intégrité: nous défaillons tous, la promesse donc de
la Loy est inutile. Voilà pour un item.
Si on allègue, Et comment? Dieu s'est-il
voulu mocquer des hommes? nenni: mais c'est que
tousiours ils sont trompez de vaine gloire et
présomption, qu'ils se font accroire qu'ils pourront
acquérir salut, il faut que Dieu leur dise, Or sus,
si vous estes tant habiles gens que vous cuidez,
monstrez le: quant à moy ie vous baille ma Loy,
et vostre salaire vous est tout appresté, si vous
l'accomplissez, à fin que vous ne pensiez point
estre abusez quand vous m'aurez servi. Voilà incontinent
la vie éternelle qui vous est toute
aBSeuree: mais qu'on voye un. peu ce que vous
sçavez faire, mettez vous en oeuvre. Or quand les
hommes auront bien essayé tout ce qui est en eux,
il est certain qu'ils cognoistront leur débilité qui
auparavant estoit cachée. Voilà donc comme la
promesse de la Loy ne peut avoir son effect envers
nous, et neantmoins elle n'est point frustratoire :
car elle nous sert à autre fin. Touchant de la
menace, elle est infallible, nous sommes tous damnez
par ceste menace, Qui n'accomplira le tout, il
sera maudit. Or tant s'en faut que nous accomplissions
le tout, qu'il n'y a pas un seul article auquel
nous ne soyons redevables. Si nous cuidons
servir Dieu en partie, ce n'est rien: car il n'a pas
séparé l'un d'avec l'autre: mais il a voulu que celuy
qui chemine en chasteté, s'abstienne aussi de rapines,
et de pillage, et de fraudes et violences, et
de tout. Puis qu'ainsi est, notons que la menace
nous tient tout enclos, et c'est à quoy sainct Paul
a regardé. Touchant des ceremonies, c'est une confirmation
pour monstrer que nous sommes maudits,
comme nous avons traitté que sainct Paul aux
C0I08. 2 0. 14 les accompare à des obligez et des
instrumens authentiques, qui seront pour tenir une
personne plus estroittement en son lien. Quand un
homme aura emprunté quelque somme d'argent, il
la doit: il en fait schedule de sa main: cela doit
bien suffire, mais s'il hypothèque son bien, qu'il
oblige sa personne, et que l'instrument soit public,