commentariüs in epistolam pauli ad corinthios il - Archive ouverte ...

499 SERMONS 500
et qu'elle ne nous apporte de soy aucun profit. Car
elle regarde à corriger l'orgueil duquel nous sommes
tellement infectez, que nous en crevons, et faut qu'il
se purge par un remède violent : et quel est ce remede-là?
Voici Dieu qui nous propose, Or sus,
vous murmurez si ie ne vous traitte à vostre appétit:
mais ie vous declare que non seulement en ce
monde et en ceste vie caduque, i'espandray de mes
graces et de mes benefices sur vous: mais encores
ie vous reserve l'héritage immortel, moyennant que
vous me serviez : servez moy, et venons à bon conte :
et alors soyez certains que ie vous remunereray et
en ceste vie et en l'autre. Quand Dieu parle ainsi,
ce n'est sinon à fin que les hommes ayent la bouche
close, et qu'ils confessent que si Dieu les punit, et
qu'il leur envoyé beaucoup d'afflictions et de misères,
que c'est à bon droit, tellement que tous ceux
qui auront bien examiné leur vie, confesseront, voire
sans feintise, helas, si nous ne sommes pas dignes
de manger du pain pour estre soustenus en ceste
vie caduque sur la terre: comment pourrions-nous
acquérir par nos mérites l'héritage de paradis, la
gloire qui n'appartient qu'à Dieu seul? Comment
pourrons-nous parvenir là par nostre vertu? "Voilà
donc comme le caquet des hommes est du tout
rabbatu, quand Dieu leur donne ceste promesse si
ample et si liberale que ceste-ci. Or nous avons
à noter cependant que ceste promesse est gratuite
de soy: mais toutesfois si sommes nous frustrez de
tout ce qu'elle contient, iusques à ce que nous y
ayons renoncé. Ceci seroit obscur, s'il n'estoit déclaré
plus au long. Les Payens, comme desia nous
avons dit, ont bien cuidé estre rémunérez de Dieu
quand ils vivoyent d'une façon honeste et irrépréhensible
devant les hommes. Or c'a esté une folie,
voire une rage du tout: car qu'est-ce que Dieu
nous peut devoir, comme il nous est remonstré au
17. de sainct Luc? Quand les hommes feront
mieux que les Anges de paradis, peuvent-ils obliger
Dieu par cela? nenni, car ils sont desia siens de
nature: comme nostre Seigneur Iesus aussi ameine
ceste comparaison d'un serviteur: non pas de tels
serviteurs qu'on a auiourd'huy, mais de ceux qui
estoyent esclaves, de ce temps-là. Quand un serviteur
se fust cent fois tué pour son maistre, il
estoit à luy à vivre et à mourir. Nostre Seigneur
Iesus donc met en avant, Or çà vous n'estes que
poures creatures mortelles, si quelqu'un de vous a
un esclave: il le tiendra là comme un asne ou un
boeuf: et s'il a travaillé tout au long du iour avec
grand peine et labeur, quand le soir il retournera
en la maison, le maistre ne le fera point seoir à
table: car le serviteur s'est acquitté de son devoir,
et n'a rien fait à quoy il ne fust tenu. Or maintenant,
Dieu sera-il de moindre condition ou pire
que ne seront pas les hommes mortels? Quand
vous estes du tout siens, si chacun s'efforce de cheminer
en son obéissance, si est-ce qu'encores ne
vous peut-il rien devoir. Ainsi comme i'ay desia
déclaré, quand Dieu dit en sa Loy, Qui fera ces
choses, il vivra en icelles, et qui l'a esmeu d'une
telle libéralité de nous promettre la vie éternelle?
Ce n'est pas qu'il nous deust rien. Tuons nous
cent mille fois pour le servir, si est-ce que cela ne
le pourra pas obliger à nous rendre aucun salaire:
mais de superabondant, il vient et dit, Combien
que ie ne vous doive rien, et aussi que vous ne
me puissiez rien apporter qui mérite aucun salaire
(car vous m'estes obligez en tout et par tout), si
est-ce que ie vous veux recompenser de vostre
peine. Or sus donc mettez vous en vostre devoir,
faites ce que ie vous commande, et vous ne serez
point frustrez de vostre salaire. Voilà donc en
somme ce que nous avons à retenir, comme encores
ci après il faudra derechef en parler.
Or les Papistes confesseront bien cela en partie,
non pas encores communément: car la pluspart,
i'entens de ceux qui auiourd'huy sont les vrais supposts
du Pape, ne sçavent rien de ces principes,
mais si est-ce qu'aucuns accorderont, quand Dieu
a promis en sa Loy salaire de vie à ceux qui l'auront
servi, que c'est pour monstrer que les oeuvres
ne sont pas de telle valeur qu'elles méritent la vie
éternelle, sinon à cause de la promesse: mais présupposé
que Dieu s'est obligé comme il a fait, ils
cuident que nous méritons donc, et pourquoy? Car
c'est en vain que Dieu auroit prononcé ce mot, Qui
fera ces choses, il vivra en icelles. Or ils ne regardent
point, les poures bestes, ce que i'ay desia
déclaré, c'est à sçavoir que Dieu n'a point dit cela,
à fin que les hommes puissent acquérir salut par
leurs mérites: mais c'a este plustost à fin de les
tenir conveincus et les amener à vraye humilité,
laquelle ils fuyent tousiours par folle outrecuidance
et ambition. Nous voyons donc maintenant en
somme l'intention de sainct Paul: c'est que si nous
prétendons d'estre iustifiez par la Loy et en nos
oeuvres, qu'il ne faut rien laisser derrière ne mettre
en oubli: car il est dit, Qui fera toutes ces choses,
vivra en icelles. Or maintenant qui sera si habile
homme qui se puisse vanter de s'estre acquitté envers
Dieu? Il n'y a que les hypocrites qui soyent
enyvrez en une présomption diabolique, ou bien des
gens profanes qui se mocquent de Dieu, et qui iamais
n'ont esté solicitez à repentance, et qui ont
eu tousiours leurs consciences endormies, ou plusto8t
ensorcelées: il n'y a que ceux-là qui se trompent
et qui cuident bien mériter. Or puis qu'ainsi
est que la iustice de la Loy nous est close, et que
nous en sommes du tout déboutez, il nous faut
venir à l'autre iustice, c'est que Dieu nous accepte
gratuitement par sa pure bonté, et qu'aulieu de re-