commentariüs in epistolam pauli ad corinthios il - Archive ouverte ...

441 SUR L'EPITRE A.UX GALATES. 442
d'un franc courage, encores que nostre conscience
nous redargue, et que nous sçachions qu'il y a
beaucoup de peohez en nous. Et pourquoy? car
nous ne sommes pas fondez sur nos mérites, mais
en la pure miséricorde de Dieu: et par là nous
sommes enseignez que Dieu reçoit nos oeuvres,
combien qu'il y ait beaucoup à redire, que nous
luy sommes agréables encores qu'il y ait beaucoup
de vices et de macules en nous. Et voilà pourquoy
il dit par son prophète qu'il accepte le service
que nous luy rendons, comme un père acceptera
le service que luy fait son enfant. Voilà un
enfant qui voudra obéir à son père: quand son
père luy dira, Pay ceci, le père acceptera cela,
combien que l'enfant ne sçache qu'il fait: mesmes
que quelquefois il gastera une chose, et toùtesfois
le père se contentera d'avoir perdu ce qu'il a perdu,
voyant l'affection de son enfant, et qu'il a désir de
le servir. Si on prend un homme à loage, on voudra
qu'il face sa tasche. Et pourquoy? car il attend
son salaire: et aussi on ne veut pas qu'il gaste la
besongne qu'on luy aura mise entre mains : et mesmes
si elle n'est pas bien faite, on ne s'en contentera
pas. Or nostre Seigneur parlant de la grace
de l'Evangile, dit qu'il recevra nos services, tout
ainsi qu'un père reçoit l'obéissance de son enfant:
encores que tout ce qu'il fera ne vaille rien: c'est
à dire qu'il n'aura point égard à la perfection qui
y sera, car elle ne s'y trouvera nulle : mais il nous
supporte par sa bonté. Il se monstre si humain et
liberal envers nous que ce que nous ferons, il l'a
pour agréable, encores qu'il n'en soit pas digne et
qu'il ne le mérite pas.
Voilà donc comme nous pouvons avoir un franc
courage de servir à Dieu : c'est quand nous sommes
asseurez que toutes nos oeuvres sont bénites de luy
pource que ce qui y est de macule est nettoyé par
le sang de nostre Seigneur Iesus Christ. En somme,
d'autant que Dieu se monstre pitoyable envers nous
et qu'il use d'une miséricorde inestimable, cognoisson8
que ce n'est point à fin qu'un chacun s'esgaye,
qu'il se lasche la bride sur le col, et que nous facions
des chevaux eschappez: nenni. Mais tout au
contraire c'est à fin que ce glaive de la parole de
Dieu nous transperce iusques au coeur, à fin de
faire un examen tel que nous soyons vrayement
humiliez pour demander pardon à Dieu. Non pas
que nous ayons ces scrupules qu'ont les Papistes,
qui nous empeschent et retardent de venir à Dieu,
pour dire, Et poure creature, que fais-tu? Et que
sçais-tu si Dieu t'aime ou non? Que nous n'ayons
point cela: mais que nous soyons tous résolus que
Dieu nous regarde en pitié, et qu'il accepte nos
oeuvres, non pas pour mérites ou dignité qu'il y
trouve: mais d'autant que nous sommes conioints
à nostre Seigneur Iesus Christ. Nous voyons donques
maintenant ce que sainct Paul a voulu dire.
Nous voyons aussi que ceste doctrine n'a pas esté
pour ce temps là seulement: mais qu'auiourd'huy
elle nous est autant utile et nécessaire que iamais,
d'autant que les ennemis de Dieu combatent contre
l'Evangile et qu'ils desgorgent leurs blasphemes,
il faut que nous ayons de quoy leur résister, et
non seulement à eux, mais aussi à Satan : lequel
de tout temps a eu ceste astuce de faire accroire
aux hommes qu'ils pouvoyent vivre en eux mesmes,
et par leurs mérites: mais cela n'est sinon pour
nous endormir en la mort. Et pourtant cognoissons
qu'il vaut beaucoup mieux que nous mourions à la
Loy que d'y vivre: c'est à dire que nous cognoissions
que si Dieu entroit en conte avec nous, que
nous serions tous perdus et damnez: et qu'estans ainsi
confus, nous souffrions d'estre crucifiez avec nostre
Seigneur Iesus Christ : et quand nous aurons cognu
qu'il nous a reconciliez à Dieu son Père, par le
sacrifice qu'il a offert, qu'aussi nous souffrions d'estre
gouvernez par son sainct Esprit, et qu'il nous renouvelle
en telle sorte que vrayement nous vivions
à Dieu, estans morts en nous mesmes, pour quitter
toute présomption de iustice, et aussi pour batailler
contre toutes les cupiditez de nostre chair, et pour
nous retirer de oe monde.
Or nous DOUS prosternerons devant la maiesté
de nostre bon Dieu, en cognoissance de nos fautes,
le priant qu'il nous les face sentir, et que ce soit
pour nous retirer des ordures ausquelles nous sommes
plongez, et nous conioindre à nostre Seigneur Iesus
Christ, en telle sorte qu'il nous attire à Dieu son
Père, et que de plus en plus il nous en face approcher,
iusques à ce que nous y soyons conioints
pleinement. Ainsi nous dirons tous, Dieu tout puissant,
Père celeste etc.