commentariüs in epistolam pauli ad corinthios il - Archive ouverte ...

425 SUR L'EPITRE AUX GALATES. 426
donc ceux qui auront une belle apparence en leur
vie, ne laisseront pas d'estre tousiours condamnez
devant Dieu. Voilà en quoy S. Paul a voulu forclorre
toute vaine confiance que les hommes pourront
concevoir et nourrir de leurs propres mérites.
Or il y a encores plus: car il ne parle pas seulement
des hommes qui ont esté comme délaissez
de Dieu, et qui n'ont point esté renouveliez par
son sainct Esprit: mais quand il dit toute chair,
il comprend aussi bien les fidèles. Gar encores que
l'Esprit de Dieu habite en nous, après qu'il nous
a attirez à la cognoissance de son Evangile, et nous
a entez au corps de nostre Seigneur Iesus Christ:
combien donc que l'Esprit de Dieu habite en nous,
tant y a que nous sommes compris tous sous ce mot
de chair, pour le regard de ce qui nous est propre.
Ainsi donc sainct Paul prononce ici, que nulle
chair ne sera iustifiee, d'autant que les infidèles
sont condamnez en Adam et demeurent en leur
condamnation, et les fidèles seront tousiours imparfaits,
qu'ils auront beaucoup de vices et beaucoup
de taches: les voici donc aussi bien condamnez que
les autres, et ceste condamnation est generale, que
qui veut estre iustifié par les oeuvres de la Loy, il
se trouvera tousiours redevable, voire les plus
saincts qui ayent Jamais esté. Quand nous prendrons
Abraham qui a esté un miroir de toute perfection:
quand nous prendrons David qui a esté excellent
en toutes vertus, et leurs semblables, iusques à
Noé et lob et Daniel, qui sont nommez comme les
trois iustes par le prophète Ezechiel, si est-ce neantmoins
que ceux-là sont enclos en ce reng, c'est à
sçavoir qu'ils n'ont peu obtenir iustice devant Dieu,
sinon par grace.
Or maintenant ie vous prie, que sera-ce de
nous? ne faut-il pas que le diable précipite en
terrible orgueil ceux qui auiourd'huy encores diront
qu'ils peuvent estre iustifiez par leurs mérites ou
par leurs oeuvres méritoires, comme ils les appellent?
Car qui est celuy qui se pourra faire egal ou à
David, ou à Noé, ou à Abraham, ou à Daniel?
Ne faut-il pas encores que les hommes ayent beaucoup
profité en l'eschole de Dieu, et qu'ils soyent
enflammez d'un vray zèle de s'adonner du tout à
luy, qu'encores ils soyent conveincus, qu'ils sont bien
loin d'estre parvenus à un tel degré tel que nous
voyons David comme nous voyons aussi et Noé et
Daniel. Quand donc nous cognoistrons cela, notons
que le sainct Esprit abat ici ceux qui nous surmontent
de beaucoup, à fin que tant plus nous
demeurions confus, pour n'avoir point une seule
goutte de reserve de gloire : mais que nous cerchions
tout ce qui appartient à nostre salut en la pure
grace de nostre Seigneur Iesus Christ. Voilà donc
comme doit estre entendue ceste sentence là, où
sainct Paul prononce que nulle chair ne sera iusti­
fiee: comme s'il disoit: quand les hommes se contempleront
en leur nature, ils n'y trouveront que
mal, nonobstant toute l'apparence qu'ils pourront
avoir: ils seront assez louez et prisez en ce monde:
ils se pourront aussi abuser par vaines flateries:
mais iusques à ce que Dieu ait besongné en eux
pour les changer, il est certain qu'il n'y aura que
puantise, et toutes les vertus qu'on estimera seront
autant de vices pour mener les hommes et les
plonger en enfer. Car ceux qui sont renouveliez
par la grace de Dieu et qui ont desia profité en
son obéissance, combien qu'ils ayent des vertus que
Dieu aime et qu'il prise, tant y a qu'ils ne peuvent
pas encores apporter rien qui soit pour entrer
en conte avec Dieu : car ils se trouveront tousiours
redevables: et ce qu'ils ont de bien, ils le tiennent
de luy, et cependant tout ce bien-là est corrompu
par leurs vices et infirmitez: les voilà donc despouillez
de toute fiance de iustice. Ainsi depuis
le plus grand iusques au plus petit, nous sommes
tous condamnez: si nous cerchons maintenant nostre
iustice en la Loy, c'est un abus, nous ne l'y trouverons
pas.
Or nous voyons ici beaucoup mieux ce que
i'ay desia touché par cidevant, c'est à sçavoir que
nous allons à Iesus Christ comme au refuge, quand
nous sentons et sommes conveincus que tout ce
qui appartient à la vie des nos âmes nous deffaut:
tellement que le vray preparatif pour nous faire
croire en Iesus Christ, c'est que nous soyons touchez
d'un sentiment et apprehension vive de nos fautes.
Et voilà pourquoy aussi il dit: Venez à moy vous
tous qui estes chargez et qui travaillez, et ie vous
soulageray, et vous trouverez repos à vos âmes.
Et puis notamment il est dit qu'il est envoyé
pour annoncer message de resiouissauce aux poures,
pour délivrer ceux qui sont captifs, pour soulager
ceux qui sont, du tout opprimez et comme accablez.
Ceux donc qui se plaisent en leurs vices, iamais
n'approcheront de nostre Seigneur Iesus Christ:
Il est vray qu'ils se vanteront assez de la foy:
comme ce mot-là, quelque sacré qu'il soit, sera profané
par beaucoup de moqueurs de Dieu, chacun
voudra estre réputé Chrestien, et ceux qui sont
les plus desbauchez en toute enormité diront qu'ils
croyent autant que nul autre. Or quand un homme
parle ainsi, c'est signe qu'il n'a point une seule
goutte de foy. Car les vrais fidèles diront bien
le croy, mais c'est avec une débilité si grande que
ie voy bien que si mon Dieu n'avoit pitié de moy,
ce peu que i'ay seroit bientost aboli du tout. Ceux
donc qui se vanteront à pleine bouche d'avoir une
foy parfaite, ce sont des chiens et des pourceaux,
qui n'ont iamais gousté que c'est ni de crainte de
Dieu, ni de religion. Or quoy qu'il en soit, ce
nom de foy sera vileinement profané par ces