commentariüs in epistolam pauli ad corinthios il - Archive ouverte ...

409 SUR L'EPITRE AUX GALATES. 410
crainte de Dieu: ceux qu'on appelle des docteurs
anciens, et qui ont perverti le sens naturel de l'Escriture
saincte: ils ont esté comme ensorcelez de
Satan, et cependant le poure monde a esté si aveuglé
qu'il n'a point cognu cela. Ceux là donc ont ici
exposé que nous ne sommes point iustifiez par les
oeuvres de la Loy, c'est à dire par la circoncision,
pour nous abstenir de certaines viandes, et pour
garder une telle feste: mais cependant sainct Paul
ne dispute point de tout cela. Il oppose la grace
de Dieu à toutes nos oeuvres : bref, il monstre que
nous ne pouvons rien apporter à Dieu: mais qu'il
nous faut estre receus de luy. Voilà l'intention de
sainct Paul.
Or si nous n'avions ce but là devant nos yeux,
il est certain que ce seroit une chose frivole de toute
la doctrine qui est contenue en ceste Epistre. Au
reste notons que sainct Paul quelque fois dira bien
simplement et sans queue, que nous sommes iustifiez
sans oeuvres: comme au troisième chap, des
Romains il dit que nous avons une approbation
claire et certaine de nostre iustice : c'est à dire que
nous avons iustice devant Dieu par la remission de
nos péchez, et non point par nos oeuvres : il ne dit
point là par les oeuvres de la Loy : il couche le
mot simplement, afin que toute bouche soit close,
et que tous subterfuges soyent ostez. Mais tant y
est que ce n'est point sans cause qu'il parle des
oeuvres de la Loy pour mettre à néant tous les
services que les hommes pourroyent mettre en avant
pour obliger Dieu, comme s'ils pouvoyent se iustifier
d'eux mesmes. Car comme nous verrons ci
après, encores que nous eussions une perfection angelique,
ce ne seroit point pour faire que Dieu nous
fust obligé en rien qui soit, sinon d'autant que de
son bon gré il nous a donné ceste promesse en sa
Loy: Qui fera ces choses, il vivra en ioelles. Si
donc nous prétendons d'acquérir grace devant Dieu
par nos oeuvres, il ne faut point disputer selon la
philosophie que Dieu nous doive aucune retribution
ni salaire, quand nous l'aurons servi: car nous
sommés siens et ne pouvons pas l'astreindre à nous
en façon que ce soit. Comment donc est-ce que
nos oeuvres pourroyent estre récompensées si elles
estoyent suffisantes devant Dieu ? c'est pour ce qu'il
nous l'a promis. Voilà une paction qu'il a contractée
avec nous en disant: Qui fera ces choses, il
vivra en icelles. Ainsi donc si nous pouvons garder
la Loy en sa perfection, il est certain que nous serions
iustes devant Dieu, et que nous aurions mérité
salut: non pas encores pour dignité qui soit en
nous, mais pour ceste paction là que JDieu a ainsi
faite. Car nous voyons que tout le mérite qui pourroit
estre allégué du costé des hommes ne despend
sinon de ceste promesse. Et voilà pourquoy sainct
Paul dit tousiours oeuvres de la Loy, oeuvres de
la Loy: car il n'y a point d'autres oeuvres qui méritent
d'estre receuës de Dieu et d'avoir aussi aucune
recompense. Voilà donc pour un item.
Or nous verrons ci après que nous sommes
exclus de toute ceste iustice là, pour ce que nous
défaillons: et au lieu que Dieu declare que nous
serons sauvez en gardant la Loy, c'est autant
comme s'il disoit que nous sommes tous damnez.
Et pourquoy? Car il n'y a celui qui s'en acquite:
mais nous sommes tous transgresseurs. Voilà donc
la Loy qui ne nous peut apporter que mort, à
cause de nostre infirmité: mais cela sera déduit
plus au long en son ordre. 11 suffit pour ceste
heure, que nous sçachions que sainct Paul met en
avant ceste doctrine contre les Iuifs qui se glorifioyent
et estoyent enflez d'une vaine présomption,
comme si Dieu eust esté obligé à eux en observant
les ceremonies de la Loy: non, non (dit-il), cela
n'est rien, et nous en verrons la raison ci après.
Au reste ce que sainct Paul a debatu à cause des
ceremonies, cela est pour ce que ces hypocrites qui
se vouloyent parangonner avec Dieu et vouloyent
avoir la louange de leur salut, s'amusoyent tousiours
à des menus fatras, et ne venoyent point au principal,
c'est à sçavoir d'entrer en leur conscience:
comme auiourd'huy en la Papauté ceux qui preschent
tant leurs mérites, et qui disent qu'il nous faut acquérir
paradis par nos oeuvres, et encores que
nous soyons pécheurs, que nous avons le moyen
de nous acquiter envers Dieu par satisfactions, que
mettent-ils en avant? Ces gros Rabbins-là, quand
ils voudront ainsi mettre les hommes sur un
echaffaut pour estre prisez comme des idoles, après
avoir fait leurs grandes prefaces du franc arbitre,
de leurs vertus, de leurs satisfactions, de leurs
mérites, qu'apportent-ils? Sera-ce pour exhorter
qu'on vive chastement, sans faire toit à autruy,
sans aucune affection d'avarice, qu'un chacun se
contente de ce qu'il a, que nous soyons patiens en
adversitez, que nous souffrions iniures et opprobres,
que nous monstrions que nous sommes disciples de
nostre Seigneur Iesus Christ en renonçant à nousmesmes?
Or, il ne sera point question de tout
cela: mais voici les bonnes oeuvres qu'ils mettront
en avant: c'est qu'il faut aller dévotement à la
messe, et devant qu'entrer au temple prendre de
l'eau bénite, de faire tant de croix, de s'agenouiller
devant un tel pilier, d'aller adorer un marmouset,
de courir un pèlerinage, d'observer une telle feste,
de fonder une messe, de donner pour les trespassez,
de faire ceci et cela. Ainsi donc tous ces hypocrites,
qui se veulent ainsi iustifier par leurs propres
mérites, ils n'ont que des badinages et des sottises,
et leur semble toutesfois qu'il y a une telle saincteté
et perfection, qu'il n'y a que redite: quand ils
auront fait beaucoup d'agios, beaucoup de conte-