commentariüs in epistolam pauli ad corinthios il - Archive ouverte ...

317 SUR L'EPITRE AUX GALATES. 318
estoyent créez pour rendre service à Dieu, se sont
tourmentez, et ont prins beaucoup de peine, mais le
tout a esté frustratoire et inutile, d'autant que ils
n'ont point commencé par ce bout, c'est à sçavoir
de reigler leur vie à la volonté de Dieu, et d'avoir
pleine certitude qu'ils n'attentôyent rien, sinon ce
qui leur estoit commandé par luy. Voilà donc
comme nostre service sera auioùrd'huy agréable à
Dieu, c'est quand nous luy presterons l'aureille,
que nous souffrirons d'estre enseignez en sa parole,
d'estre gouvernez du tout par icelle, et que nous
conformerons là pleinement nostre vie et toutes nos
oeuvres et nos pensées. Et en cela voyons nous
le bien que Dieu nous a fait, quand il nous a
appelez à la cognoissance de son Evangile. Or
d'autre costé nous contemplons les poures Papistes
(comme desia nous avons touché). qui se lèvent
matin, qui s'appliquent à ceci et à cela, ils n'auront
ne fin ne cesse en leurs devotions: et cependant
non seulement ce n'est pas un temps perdu, et leur
travail est frivole et inutile: mais ils sont détestables
devant Dieu. Puis qu'ainsi est donc, que
nous- prisons ceste grace qui nous est faite, quand
Dieu nous a déclaré sa volonté, et que nous sçachions
qu'il ne nous faut point cheminer à l'aventure,
et que nous avons à discerner entre le bien
et le mal, non point par nostre sens et phantasie:
mais d'autant que Dieu nous a amenez en son
eschole, et qu'il nous approuve, et que nous sçavons
qu'il ny a rien qui mérite d'estre prisé, sinon de
nous conformer à la reigle qu'il nous a donnée par
sa parole. Voilà pour un item.
Et cependant aussi nous voyons quelle est la
maiesté de l'Evangile, et qu'il n'est point ici question
d'amener en avant l'opinion des hommes pour nous
envelopper en quelque doute: comme auioùrd'huy
les Papistes n'ont autre bouclier contre nous, sinon
des traditions de l'Eglise, des Conciles et de
l'ancienneté: mais quand ils auront amassé tout
le monde, cela vaudroit-il les Anges de Paradis?
Il est certain que non. Or donc nous pouvons bien
nous moquer de leur sottise, à l'exemple de sainct
Paul, et dire que quand le Pape et toute ceste infection
de son clergé auroyent les Anges de leur
costé, que ce ne seroit rien au pris et en comparaison
de nostre Seigneur Iesus Christ, qui a tout
empire souverain, et devant lequel tout genouil
doit estre ployé: et non seulement des creatures
terrestres, mais de ce qui est là haut au ciel,
comme aussi il en est parlé en l'Epistre des Philip.,
là où ce passage est appliqué à sa personne, quand
Dieu iure que tout genouil sera ployé devant luy,
et que toute langue confessera qu'il faut que luy
seul soit glorifié. Voilà donc comme nous devons
priser la doctrine de l'Evangile, c'est que nous ne
soyons point esbranlez par l'authorité: des hommes:
quand on nous alléguera qu'un tel pense ainsi, que
nous sçachions puis que Dieu nous a fait ce bien
de nous résoudre, qu'il nous faut là tenir sans
iamais changer. Voilà en somme ce que nous avons
à retenir de ce passage.
Or sur cela sainct Paul monstre que ce n'est
point sans cause qu'il a ainsi parlé de son Evangile
qu'il avoit presche. Car il dit qu'il n'enseigne point
selon les hommes, ou qu'il ne met point les hommes
en avant, et qu'il ne conseille pas d'une façon humaine,
mais qu'il propose Dieu, et qu'il ne cerche
point de plaire aux hommes, mais à Iesus Christ. Et
puis il adiouste que son Evangile n'est point des
hommes, mais qu'il luy a esté révélé d'en haut,
comme desia nous avons traitté par ci-devant. Ce
n'eust pas esté assez que sainct Paul eust parlé
de l'Evangile en general, sinon qu'il eust monstre
quant et quant qu'il eust esté vray et fidèle ministre.
Car le diable souffrira bien que le nom de l'Evangile
soit fort authentique entre nous: mais cependant
nous ne sçaurons pas qu'il veut dire, et ne
laisserons pas d'estre enveloppez en beaucoup
d'erreurs, et aurons nos esprits vagabons çà et là.
Il ne suffit point donc que le nom de l'Evangile
soit honoré au monde, mais il faut que nous sçachions
quel est cest Evangile, et quelle substance
y est contenue. Et voilà pourquoy sainct Paul
s'attribue ceste fidélité d'avoir enseigné l'Evangile,
en sorte qui si on y change rien, que cela soit tenu
comme detestable. Or ceci est encores bien à noter:
car les Papistes quand ils lisent ce passage, ne s'en
font que moquer: et Dieu aussi les a hebetez, qu'il
y a moins de sens qu'en des petis enfans. Car ils
disent que sainct Paul a entendu que si on faisoit
un autre Evangile, comme si on escrit un livre, et
que ce ne fust point l'Evangile qui avoit esté escrit
par luy, qu'alors on devoit reietter tout cela, d'autant
que l'Evangile estoit assez approuvé. Or cependant
ils n'estiment point que ce qui est contenu en
toutes les Epistres de sainct Paul soit Evangile:
mais ils imaginent plustost qu'il ait escrit quelque
histoire de l'Evangile, et que ceux qui ne l'avoyent
point receu, quand on leur en apporteroit quelque
autre, que cela n'eust nul tesmoignage ne reputation.
Or nous voyons là que ces poures bestes
n'ont ni raison ni intelligence, ne goust aucun.
Tant plus donc nous faut-il observer, que sainct
Paul non sans cause a parlé de l'Evangile qu'il
avoit presche, voire monstrant comme au doigt la
doctrine laquelle il nous faut avoir pour résolue.
Voulons nous estre du troupeau de nostre Seigneur
Iesùs Christ? Ce n'est point assez que nous acceptions
ce qui nous est dit en son nom, mais il nous
faut prattiquer ce qui est dit au dixième chap, de
S. lean, qu'en escoutant sa voix nous la puissions
discerner de la voix des estrangers, et que nous