II - Université de Provence

Pèr coungreia l’Idèio e la faire espeli,
Lou grand soulèu fai naisse e pièi fai trefouli
Tout ço que pòu vesti la naturo aboundouso,
La moustra talo qu’es, drudo, meravihouso...
Regardas:
Quand si rai s’endavalon d’aploumb,
Li blad pereilalin balançon si péu blound;
Dins la plano es lou prat verdejous que fresquejo,
Es la margarideto au mitan que blanquejo,
Es lou long di draiòu lou mau-d’iue rouginèu,
Es lou grun de rasin que negrejo sa pèu,
Es l’arange que vèi daura sa carnaduro,
Es pièi de l’oulivié lou fru que s’amaduro...
Tablèu meravihous! Arc-de-sedo divin!
Que de nosto Prouvènço encadro lou jardin!
... As vougu, Diéu vivènt! qu’en si lèio flourido,
De la plano esfatado i colo abouscassido
Quand li chatouno van, l’auceloun pivela
Dins soun amiracioun ameise soun quila;
Que la plus bello flour de dessus sa branqueto
Semblèsse saluda la rèino di floureto!...
... As vougu, Diéu vivènt! que tóut à noste entour
Nous parlèsse d’espèr, e de glòri, e d’amour..
Escoutas, Prouvençau:
Dins lou cant di palun,
Quouro sus li canèu boufo lou revoulun;
Dins lou rounfla dóu Rose, image de la vido,
Acoursant vers la mar sis aigo entreboulido;
Dins l’ourla que la mar, s’aleno lou marin,
Vèn faire en s’esclapant sus li roucas Aupin,
O lou poutoun mourènt que l’erso escumejouso
Vèn faire en s’esbroufant à la plajo sablouso;
Dins lou bram dóu mistrau que di mourre auturous
S’abrivo enferouna sus li bos souloumbrous...
..... La Durènço boumbis, revouluno, cascaio
Afougado à sauta de roucaio en roucaio
E dins soun lié founsu, l’aigo que s’espandis
Barrulo sus la gravo em’un brut cantadis.....