II - Université de Provence

Dins un freirage que fai gau:
Pouèto, pacan, felibresso
Trèvon dins lou meme fougau.
Prouvençau de la bono meno,
Di rèire gardon lou parla;
A l’ounoura soun tèms s’abeno:
Prouvençau de la bono meno.
E zou! canton coume d’ourgueno
Trelus, estrambord coumoula:
Prouvençau de la bono meno
Di rèire gardon lou parla.
Dóu gai sabé canton l’astrado;
An pèr coumpan li roussignòu,
Lou vènt-terrau, la souleiado:
Dóu gai sabé canton l’astrado.
Em’éli nosto lengo amado
De pereclita n’a plus pòu:
Dóu gai sabé canton l’astrado,
An pèr coumpan li roussignòu.
Veici lis enfant de Prouvènço
Qu’endrudi sonon lou rampèu
Dis us toumba dins l’inchaiènço:
Veici lis enfant de Prouvènço.
Sus l’autar de la Reneissènço,
Valènt, desplegon soun drapèu:
Veici lis enfant de Prouvènço
Qu’endrudi sonon lou rampèu.
- - -