DERNIEROS BELUGUOS POETIQUOS PER PIERRE BELLOT ...

LOU DUC ET LOU CROUPATAS.
FABLO
Dediado à moun ami REYMOUNET, pharmacien.
Aoou cloousoun finit la noublesso!
Dégun v'ignoro, un enfant va dirie;
Aqui, marquis, baroun, paoure, duc vo duchesso,
Lou grand espert, dins sa sagesso,
A vougut rendre tout parie.
Un Croupatas dins, sa vieillesso,
S'ero mes dins la boulo, a soun radier printemps,
Qu'ero segur baroun, et perdiet tout soun temps
A publicar partout sa tiero de noublesso.
Un soir que leis oousseous fasient un grand galat,
Souto un beou ciel bluret, tout cafit d'estelletos,
Eis bords d'un pichot rieou mouchetat de vieouletos,
Si presento et li dich: — Davant moun sup plumat,
Roturiers clinaz vous, car sieou de noble raço!
V'ai sachut, l'a doux mes, de ma coumaire Agasso;
Ensin v'espantez pas, s'aro davant moun noum,
L'enregui lou grand D, que douno aqueou renoum.
Souto capo en risent, leis oousseous si clinerount
Et per si trufar d'eou, toutis l'applaoudisserount,
Hormis d'un nistoun Rigalet
Et d'un Merle-Blanc que siblet.
Per mies lou faire anar, sutran touteis criderount:
Fouero lou Rigalet! fouero lou Merle-Blanc!
Vivo, vivo à jamai, lou baroun qu'es tant franc!
Et leis echos deis baous, meme cris repeterount.
Aqui, lou Croupatas, s'enflo d'un sot orgueilh,
Coumo aou jour que per faire aouvir soun beou ramagi,
Un flatour de Reynard li bousquet soun froumagi
Acloune, tout countentet d'un tant brillant accueilh,
Sus un tapis de flours d'oou plesir si vieoutavo,
Coumo un pavoun si pavanavo.
Un Duc, que vesiet pas tout aquo de bouen hueil,
Li dich: — Rascas, as lou couragi
De ti masquar d'un D, d'un noble parentagi?
Voueli faire passar ta noublesso pet hueil!
Pouarti de mai que tu vingt ans sus moun esquino;
Ai couneissut toun grand, toun paire, ta meirino,
Toun reire grand;
Dins seis venos jamai raget de noble sang;
As bello a nous citar que ta coumaire Agasso
Counouisse ta lignado, et sies de noblo raço!
V'as pantailhat, n'es pas verai!
— Sieou baroun, crei-ti-va! deman va prouvarai,
Reprend lou Croupatas, a l'augusto assemblado.
— As la testo troublado,
Jamai sies esta noble et va seras jamai!
Ti counouissi de longuo toquo,
D'un roturier sies que la broquo;
Ensin, blagues pas mai.