DERNIEROS BELUGUOS POETIQUOS PER PIERRE BELLOT ...

Quand lou temps de soun dailh marquo sur vouestre espalo
Mai de septento hivers, que battes que d'un alo;
Que per estoupinar, goudiflar leis inguents,
Vous manquo leis tres quarts, vo ben touteis leis dents,
Quand dins un guletoun vous counvidoun, pecaire!
Que souto vouestre naz, viaz passar de tout caire,
Becasso, pardigaou, lapin, canard, dindoun;
Que cade counvidat si retiro redoun,
En fen de zig et zag, dansant la carmagnolo,
Lou vielh souarte d'aqui lou ventre a l'espagnolo!!
Per eou, vaout mies alors, eici, coumo a Coudous
Que vague vouyagear aou pays deis darbous.
Sias guarit de tout maou quand sur vouestro carcasso,
Li creisse la maougueto et courre la limaço.
Pamen, n'eimarieou pas, aou plus gros deis hyvers,
Intrar dins lou cloussoun; vaout mies faire de vers;
Mai leissens de coustat leis amaros pensados.
Dins un camin plus doux voueli faire meis piados,
Changear, per dire mies, moun sot resounament.
Adoun, brave pitouet, ti faou moun coumpliment
Deis grands prougrets que fas dins la lettre menudo.
Se li vas d'aqueou trin, jamai de sa man rudo
Lou savent magister sur tu basselara;
A toun viesti souvent la croux pendouelara.
Enreguo lou drayoou de toun vertuous paire,
Si voues estre cherit, coumo eou, dins lou terraire.
N'imites pas, surtout, toun peirin vergougnous;
Car series, moun ami, lambin et vanelous.
T'avieou proumes d'anar dins toun poulit villagi,
Toumbar coumo uno boumbo, et rouigar toun froumagi,
Mai ce qu'es retardat, bouto! n'es pas perdut;
Car a moun couel deja ti li voudrieou pendut.
Oh! d'anar t'embrassar moun couar d'envegeo brulo.!
Mai ti faou lou serment qu'avant la caniculo,
Aqueou jour de bouenheur, tant de tems desira,
Per toun paoure peirin, segur qu'espelira.
Aro, per acabar, sur la mar de la vido,
Desiri que longtems vanegue toun bateou;
Que rescontre jamai, dins sa courso rapido,
Rafalo, brafounie, ni mai lou mendre esteou;
Que sa vello toujours, moun bouen, siegue tesado
Per lou vent amistous de la prousperita;
Et quand aouras finit ta longuo traversado,
Per prex de teis vertus, toun amo siet poussado
Aou sejour benhuroux per uno eternita!
IMITATIEN D'UNO CANSOUN FINOISO.
Ah! se veniet moun ben aimat!
S'encaro vouliet repareisse!
Soun abord fariet dispareisse
Leis tourments d'un couar enflamat.
Un de meis regard, tems passat,
Espandissiet soun couar, soun amo;
Ero alors per yeou tout de flamo;