Télécharger au format pdf (2,6 Mo)

Lou bastidan Guilhèm, riche, encar d'un bouen iagi,
Qu'aviet tant d'esperit que lèis grapaus de couet,
Passavo, cade estieou, lèis nuechs dins lou grattagi,
La mangeoun li rendiet la vide mauheroue.
Lou paure!... drès qu'anavo empigne la parpèllo,
Vetaquit la mangeoun, vetaquit la grattèllo,
Gratto que gratteras, s'estrassavo la pèou,
Boumbavo dins soun liech, semblavo un sarpentèou:
Poudiet plus penecar, la tèsto li petavo,
Et toute la sesoun l'esvèilh lou trementavo.
Tant, qu'à la fin finalo, un an, que si vesiet
Sec coumo soun tinèou, que si desglenissiet
Mandet quèrre à la villo en touto deligènci
Un Mègi renoumat, et plen d'esperiènci,
D'aquelis que sur tout an pas ges de rivaus;
Que tirassoun carrosso eme douis bèis chivaus;
Que, counèissèn lou mau rèn qu'en guèiran la caro,
Vous tratoun catecan et sènso dire garo.
Adounc lou Mègi vèn, l'aluco et puis li dis:
— Avèz uno mangeoun d'himours, à moun avis;
La bilo vous tremento et vous fa de ravagis,
Pèr v'en despegoulir foudra fouesso lavagis,
Et boutaz-vous en trin pèr acot catécan
Un autre mens sabènt vous diriet qu'es lou sang,
Lèis nèrvis, lou masclun, vo bèn la pituvito,
Yeou, qu'ai lou guèirar fin, v'ai troubat tout de suito.
Lou mau s'es achancrit, pèr lou desempegar
Sieis jours tout adarret vous voueli bèn purgar.
Adounc, cade matin, prendrez lèis medecinos;
Aurez l'avisament d'alestir fouesso èysinos
Per recampar dedins tout acot que farez,
Et v'en troubarez bèn, boutaz, va sentirez.
Adieoussias, dins huech jours tournarai pèr vous vèire,
Et vous atroubarai, segur, net coumo un vèire.
Lou Mègi dins huech jours revèn, èro un dilun.
Guilhèm, en lou vesèn, crido, dau bèou plus luench:
— Eh bèn! ai empassa lèis marridèis poutringos;
Qu'un effèt que m'an fach! piegi que lèis seringos!
— Oui? li fa lou dooutour, ha! vous v'avieou bèn dich,
Acot v’a fach sourtir lou pourridie maudich
Que vous fasiet grattar... l'a rèn èis medecinos!...
— Aviaz resoun de faire alestir fouesso èysinos,
Fet Guilhèm, es tout plen, et de toutos coulours:
Chicoulat, janne, vèrt... Mais mi gratti toujours!
— Ha! fet lou medecin, v'avieou predich d'avanco,
La mangeoun es nèrvoue, vous vau far l'ourdounanço:
Prendrez douis bèns pèr jour eme fouesso racet,
Lèis farez coumpousar d'aigo de Maupasset;
Douis balottos d'ooupien lou matin et lou sero;
Tres soupettos de riz seguidos d'uno pero:
Fèz acoto et segur que vous grattarez plus...
Duvèz vèire, moun bouen, que vous ensigni l'us.
— Mais, Moussu, fet Guilhèm, siaz lou gau de la villo,
Et pamens m'aviaz dich que souffrieou de la bilo...
— Vous aremarquo pas, fasèz ce que vous dieou!
Li diguet lou dooutour; nen sabèz mai que yeou?
Tournarai mai dilun, vous darai de rhebarbo,
Et se vous grattaz mai... que mi coupoun la barbo!
— Que lou bouen Dieou vous ause! alors li fet Guilhem,
Souffri coumo à l'infèr souffre un paure payèn!