Télécharger au format pdf (2,6 Mo)

(Le Renard et Les Poulets d'Inde)
Troou aluquar crèto la visto.
Un sero, un vieilh Rèinard, lou mèstre dèis fripouns
Sur d'un aubre aluquavo un troupèou de Dindouns
Que s'èroun ajouquas. — S'escoudoun!... per ma fisto,
Diguet, li voueli faire un tour de moun mestier.
Yeou que sieou lou plus fin Rèinard d'estou quartier
Crèirien de m'escapar?... noun, noun... va pouedoun crèire,
Mais lèis agantarai... li va vau faire vèire.
Adounc, coumo la luno èro à soun plus grand jour,
Et que si li vesiet quasi coumo à miejour,
Lou fenas li faguet millo cascarelettos,
S'enginet millo bounds, millo cabrioulettos.
S'enarquavo en sautant sur sèis pèds de darrier,
Et puis fasiet semblan d'escalar l'amourier;
Puis fasiet vanegar sa quouet; puis si couchavo
Coumo s'èro esta mouart, et subran s'adrèissavo.
Segur auriaz cresu, se v'èriaz trouba aqui,
De vèire lou pierrot de Madamo Saqui,
Vo bèn cèrtènèis gènts que fan sèis simagrèvos
Pèr si far remarquar quand passoun eis Allèyos.
Tambèn, touto la nuech, pèr lou tenir d'amen,
Noun lèis paurèis Dindouns plugueroun un moument.
A forço d'aluquar sa visto s'esglariavo
Et toujours en quauqu'un la cabesso viravo...
Patafloou dessavau!... lou Rèinard lèis preniet
Dins sèis harpiens, et puis, quand lou gus lèis teniet,
Sènso ges de pieta li mangeavo la tèsto,
Et pèr sa prouvisien gardavo tout lou rèsto.
Es ensin que souvènt la vouas d'un charlatan
(Et dins touis lèis mestiers, se sabiaz, nen a tant!...)
D'un pople de gournauds treboulo lèis cèrvèllos
En li blagan toujours de gaudouasos nouvèllos,
Et se lèis bravèis gèns li fan troou d'attentien
Lou gusas meno au bout sa marrido intentien.
(Le Philosophe Scythe)
LOU SAUVAGI
En venènt navigar sur d'aquestèis paragis,
Un Scythe qu'èro réi dins lèis pays sauvagis,
Desbarquet dins Marsilho et l'istet quauque tèms
Pèr apprèndre l'usanço et lou parlar dèis gènts.
La civilisatien li dounavo d'enragis,
Charpinavo sur tout... Souvènt aviet resoun:
Quand vesiet proumenar la bouto doou pouisoun;
Quand lèis bournèous doou gaz tant souvènt si crebavon,
Et vingt fes doou jour l'estubavoun;
Quand sentiet lou prefum doou port.
Et que puis si plagniet, ma fisto, aviet pas tort.
Puis, quand visiet de gènts, en plen jour, pèr carriero,