Télécharger au format pdf (2,6 Mo)

Escuro toun amo embrutido,
Vo dins lèis etèrnes carbouns
Ta vieilho carn sera restido.
Pènso à toun salut, faras bèn,
Car vas quitar tout autre bèn!
(Le Cordonnier et Le Banquier)
LOU GROULIER ET LOU BANQUIER
Un Groulier dedins sa barraquo
Trabailhavo et cantavo dur;
Mangeavo fouart, chimavo pur;
Lou dimenche preniet sa pichouno macaquo,
Ero fresc, gailhard coumo un pèy
Et viviet plus countènt qu'un Rèy.
Un Financier ventrut, plen de graisso et d'engano,
Aviet soun grand houstau à touquant la cabano
De Martin, lou Groulier, que cantavo toujours,
Et que veniet toutis lèis jours,
Quand doou soulèou l'aubetto adusiet lèis nouvèllos,
Recoumensar soun cant en piquan sèis semèllos:
La cambo mi fa mau; la cansoun de Marbrouk;
L' ér de la Crinolino ou bèn Lou pèiroou rout.
Lou boudenfle richas sabiet plus coumo faire:
Engourgat de louis d'or, de plesir et d'affaire,
Passavo la nuech blanquo, et puis quand, lou matin,
Anavo empigne lèis parpèllos,
Ausiet lou matinier Martin
Qu'eme sèis roumanços nouvèllos
Li fasiet sautar lèis cèrvèllos.
Plen de mourbin, un jour qu'aviet pas rèn dourmi,
Lou Cresus enfetat fa venir lou cantaire
Et li dis: — Martin, moun ami,
Digo un pauc, toun mèstier, segur, ti rendè gaire:
Quand gagnes dins un an? —Yeou, dins un a'n, Moussu?
Ma fisto! v'ai jamais sachut;
Pèr va noutar fau saupre escrioure,
Et sabi que ressemelar,
Mettre uno pèço et l'assemblar...
Basto que moun mestier tout l'an mi fasse vioure.
— Mais quant gagnes pèr jour? — Pèr jour, dis lou Groulier,
Qu'houro mai, qu'houro mens: s'adoubavi de bottos,
Aurieou pèr far fouesso ribotos;
Mais mauherousament trabailhi qu'en soulier.
— Eh bèn, li dis lou Financier,
V'aquito tres cents francs, fais-nen un bouen usagi,
Soun tieous; quand auras ges d'ooubragi
T'en sèrviras; anem, adieou!..
En sourtèn, lou Groulier remarciet lou bouen Dieou
De l'aver manda sa fourtuno:
Ho qu uno!
Cridavo, en alluquan, en coumptan soun magot...
Mais mounte mettrai tout aquo?
Se v'escoundi dins ma barraquo
Lèis voulurs bèn segur vendran
Et dins la nuech va mi prendran...