Télécharger au format pdf (2,6 Mo)

Coumo fan proun d'homes famoux,
Un jour, vouliet piquar sa filho
Que, fasèn coumo sa familho,
Marchavo aussi de reculoun.
— Marriasso!... tèsto de vieouloun.
Li disiet, maugrabieou ta caigno,
Que mi douno toujours la laigno!
M'entendes, animau testut?
Ti dieou d'anar drech davant tu?
Aluquaz-la, madamèisèllo,
Sèmblo un fielaire de ficèllo:
Reculo au luego d'avançar
Rèn que pèr mi faire fachar...
Mai!... crèses que va dieou pèr rire?
— Et vous, dounc, vous fa bello à dire,
Li fet la pitoueto à la fin,
Ensignaz-mi lou drech camin,
Fèz-mi vèire coumo fau faire;
Yeou camini coumo ma maire;
Vous seguirai dins lou moument
Que caminares autrament.
Sur d'aquo la vieilho coouquilho
Aujet plus rèn dire à sa filho,
Pèr ce qu'aquesto aviet resoun.
Quand voulèm faire la liçoun,
Quand pensam castigar lèis autres,
Fau sèmpre coumencar pèr n'autres.
Avèm bèou dire, bèou prechar,
Bèou far semblant de si fachar,
Jamais poudèm sèrvir de brido,
Se nouestro counducho es marrido...
Mèstres, parèns, va diou pèr tous,
S'avèz lou mourvèou mouquaz-vous!
(L' Aigle et La Pie)
L'AIGLO ET L'AGASSO
Uno Agasso bargeaquo, en travessan un bouesc,
Rescountret l'Aiglo sur sa routo;
La pauro si tregiret touto
Car èro un malhur pèr sèis oues.
Mais l'Aiglo aviet mangea lèis pichouns d'uno lèbre,
Soun bèc, sèis gros harpiens èroun encaro eu sang.
— Tremoules pas, li fet, vais, n'agues pas la fèbre;
L'animau qu'a mangea n'es plus gaire michant:
Parli de l'animau que n'es pas resounable;
Car l'autre, plen vo noun, es verinous en diable:
Yeou despuis qu'ai dina n'ai plus ges de verin.
Vène, ensèmble farem camin;
M'engardalas de languitudo,
Car as la lingo bèn pendudo.
Despuis que n'ai plus rèn à faire dins lèis camps,
Mi marfoundi dedins lèis champs
Et mi rèsto que la memori.
Anem, conto-mi quauquo histori