Télécharger au format pdf (2,6 Mo)

(L'Araignée et L'Hirondelle)
Uno pauro pichouno Araigno
Veniet de fielar seis arrets,
Et d'un trauc d'aquelo baraigno
Guèiravo qu'houro serien pres
Lèis cousins, mouissouns et mousquettos
Que li roudavoun a l'entour,
Et, coumo pèr li far liguettos,
Vounvounegeavoun tout lou jour.
Dins lou tèms que lèis esperavo,
Tapado dins soun cafouchoun,
Coumo un cassaire à l'agachoun,
Et qu'à courre si preparavo
(La pauro! aviet fouesso pati),
Uno affamado Dindouletto,
Qu'aviet soun nis prochi d'aqui,
Veniet, tout en fasèn l'aletto,
De longo passar, repassar,
Et, quand vesiet mousquo ou mouissaro.
Badavo sènso dire garo,
Et vague de lèis rescassar;
Mais, luego de lèis empassar,
Anavo tout d'uno voulado
Embouquar sa pichouno niado,
Qu'eme sèis bècs jaunes dubèrts,
Coumo de pichouis emboutaires,
Sénso huils, sèrquavoun de tous caires,
En badan coumo de limbèrts.
Laissaz-mi dounc bousquar ma vido,
Li fet l'Araigno, au noum de Dieou!
Va viaz pas, sieou touto avanido;
Soubraz quauquèis mousquos per yeou!
Mais sènso escoutar soun reprochi,
Esto Dindouletto risiet
De ce que l'Araigno disiet.
Un cooup li passet bèn tant prochi
Qu'embalet tararigno et tout,
Eme la mauherouso Araigno
Que pendoulavo alin au bout,
Touto espalooufido de laigno.
Es ensin qu'arribo, souvènt,
A-n-un pichoun marchand, pecaire:
Alestisse bèn soun affaire,
Estalo sa boutigo au vènt;
Mais, quand crèi d'aver la pratiquo,
Prochi d'eou si bouto un coutau
Que, plus riche, li fa la niquo
Et l'arrouino soun paure houstau.
L'ARAIGNO ET LA DINDOULETTO