Télécharger au format pdf (2,6 Mo)

Gènts que siaz riches, fèz ensin,
Sèrvèz-vous de vouestro fourtuno,
L'entarrèz pas, car lou vesin
Vous pourriet far de blad-de-luno.
Et fèz attentien qu'aujurd'hui
Lèis voulurs an bouen pèd, bouen hueilh;
Quand an pres, plus lèou que de rèndre,
Aimarien mai si faire pèndre
Dounc vivèz ben, puis doou restant
Dounaz èis paures... n'en a tant!!!
(Le Loup et Les Bergers)
LOU LOUP ET LÈIS PASTRES
Un Loup coumo n'a ges (car n'èro pas bregand,
Et fasiet qu'à regrèt d'avaries dins lou camp),
Las de far lou couquin, un jour, dins sa cabano,
Si repassavo ensin sa vido maufatano:
— Ha! que sort es lou mieou! disiet, dins cade houstau
Tremoueloun à moun noum, et sieou l'espravantau
Dèis grands et dèis pichouns, à la villo, en bastido,
Homes, fremos, enfans n'en vouelount à ma vido.
Pèr un mooutoun rougnous, lou rebut doou troupèou,
Pèr un ase poussif qu'a que d'oues et de pèou,
Pèr un chin mourvelous qu'a rèn que la carcasso
Et que rouigui pèrfes, toutis mi fan la casso.
Paysans et bracouniers, mai qu'agoun un fusieou,
M'acoussegeoun pèrtout, dins l'hivèr, dins l'estieou.
O malan! sieou maudich de touto la naturo!...
Changèm de vido, anem, l'a proun tèms qu'eiço duro
Mangèm d'hèrbo! plus lèou, coumo fan lèis mooutouns,
Auluego d'estripar, coumo lèis Loups gloutouns:
Mourèm de fam, se fau, pèr faire penitènci!
Tant-fa-tant-va; tout plen d'esto boueno sentènci,
Nouestre Loup counvèrtit travessavo un hamèou,
Quand vis de luench un fuec que couinavo un agnèou
Et de Pastres countènts qu'anavoun faire fèsto.
Bouen an, qu'es tout èiço, diguet, pèrdi la tèsto?...
— Li vesi bèn, pamens; lèis Pastres tuen l'ave,
Et s'en van regalar davant moun naz?.. au ve!
Et yeou serieou tant bouen, vo mies, serieou proun bèsti
Pèr rouigar lèis cardouns vo lou fuen, que detèsti!
Ha! pèr qu'aquo es ensin, vau faire moun mestier,
Vau roudar, vau pilhar dedins tout lou quartier,
Et se quauqu'un mi dis que va duvi pas faire,
Li respoundrai: — Messies, m'avèz touis ficha un caire!
N'es pas lou premier cooup que de gèns counvèrtis,
En vian faire lou mau soun estats pèrvèrtis;
Fan proufessien de fe, proumettoun, à l'avanço)
Mai de carn que de pan, davant touto la Franço;
Et puis, quand soun amount, an bèllo à s'enrabiar,
An bèllo à virar lèis esquinos,
Fau qu'eme lèis galinos
Appréngoun d'estrapiar.