Télécharger au format pdf (2,6 Mo)

— Car, disiet, couesto d'accampar;
En l'aguènt à manes, si poou vite escampar;
Vo bèn, pèr l'amagar, l'on a bèou si marfoundre,
Lèis voulurs bèn souvènt lou vènoun arrapar.
Adounc, soulet pousquèn pas faire,
D'un autre tailhur, soun coumpaire,
Prènd l'ajudo, lou va troubar
Et, cresèn pas que fousse un laire,
Li destapo tout soun secrèt,
Bèn qu'à regrèt;
Car de toutis si mesfisavo.
Drès que l'a counfisa la cavo,
L'autre li dis: — Compto sur yeou,
De toun affaire fau lou mieou.
Partoun dedins la nuech, van au pèd d'uno couello
Cavoun un trauc dins tèrro, escoundoun l'or au found,
Et puis, pèr lou tapar, li viroun un quèiroun.
(Raco estrachano! tèsto fouello!
Si vis bèn qu'as pèrdu lou sèns!
En que sèrve dounc l'or èis gènts
Que l'entarroun?... pauro cèrvèllo,
L'argènt es bouen que quand roudèllo!...)
Lou sero, au calabrun, nouestre adouraire d'or
Va de galapachoun vesitar soun tresor;
Arribo, destapo, regardo...
Hai! qu'a passa aqui? pas degun!
La tèrro a pas fach boueno gardo!...
Lou paure, seriet mouart se s'èro atrouba en jun...
Oh! tristo cavo!!!
Enfin, vesèn que l'or manquavo,
Coumo poou tapo mai lou trauc
Et s'en va tout drech à l'houstau
D'aqueou que l'a juga la pèço,
En disènt: — Degun nous a vist;
Es lou coumpaire, à moun avis,
Qu'a fach un tour d'aquello espèço;
Anèm-li dounc d'aquestou pas.
(L'estrachan si troumpavo pas)
En arriban li dis: — Que Dieou s'assiet, coumpaire;
Ai d'argènt a mettre de caire;
Digues rèn, foudra que deman
Mi dounes mai un cooup de man.
Ai retira de grossèis rèndos;
Et coumo ai toujours fouesso crèntos
Dèis voulurs, l'anarèm pourtar
Dins la cacho, per l'amatar.
Lou coumpaire, tout plen de joyo,
Pas plus lèou l'avare es parti,
Cresènt de mies quichar l'anchoyo,
Embrasso vite estou parti:
Courre et va lèou mettre à sa plaço
Lou magnot, en dian: — Revendrai
Et tout au cooup v'arraparai
(L'abrasamat jamais s'alasso).
Mais, dins la nuech, l'autre venguet
Tout soulet, car s'èro fach sagi;
Troubet soun argènt, lou prenguet
Et n'anet faire un bouen usagi.