Télécharger au format pdf (2,6 Mo)

Dins lou pèd d'un vieil pin, chirounat, desrusquat,
Trevavoun, uno fes, la Moustèllo, lou Gat,
L'ooussèou Machouetto eme lou Garri.
Aqui chasque vesin aviet trouba pèr barri
Uno paret de bouesc et si l'èro amagat.
Ero uno tristo vesinanço;
Car aquelis quatre animaus
Si souvetavoun fouesso maus.
Mais fasien coumo nouestro engeanço:
Avèm d'homes que si tuerien
Et qu'en si rescountran si fan bèou-bèou, si rien.
Nouestris quatre estajans, à forço de trevanço,
Sigueroun vis de l'home; aqueou, tout adarret
Prochi lou vieil pevoun vèn calar soun arret.
Un tau trèt nous deou pas sousprèndre,
Car l'home es toujours lèst quand s'agisse de prèndre:
N'a fouesso, pèr aquo, qu'estiroun lou jarret.
L'endeman de matin, lou Gat, bèn que finocho,
Quitto sa cauno pèr anar
Faire sa casso et dejunar.
Vis lou lasc... — Qu'es èico? s'approcho,
Li mando l'harpo... Crac, s'accrocho,
Et dedins mens d'un vira d’huilh
Es embaragnat dins la pocho,
Sènso pousquer passar pèr huilh.
Et vague de mioular, d'estrapiar. Quand lou Garri,
En entendèn aqueou sabat,
Si levo, souarte et vis lou Gat
Vartouyat dins l'arret coumo dins un ensarri;
Countènt, li fa: — Tant mies! se li sies, rèsto-li!
— Ha! vène vite, moun ami,
Li dis lou Gat, tiro-mi de la peno;
Sabes que t'ai toujours aimat...
— Hoc, fet l'autre, et tambèn series fouesso charmat
De mi far crussir la cadeno.
— Noun, noun, n'agues pas poou, li fet lou Gat, veiras
Que serai toun ami. Vène faire un estras
En aquello maudicho tello;
Puis, estrangoularai tèis enemis, Moustèllo
Eme Machouetto; car sabèm
Que ti voueloun gaire de bèn,
Et qu'eme ellis segur la passaries pas bèllo.
Lou Garri mesfisènt s'entournavo à soun trauc;
Mais vis Moustèllo eme Machouetto
Que l'esperavoun amoundau.
Alors, en fèn la girouetto,
S'entourno vèrs lou Gat, rouigo uno mailho..., doues...
Et puis tant, qu'à la fin, coumo l'home arribavo
Pèr vèire se l'arret tesavo,
S'espoufferoun touis dous en courrèn dins lou bouesc.
Dous vo tres jours après, lou Gat vis soun rouigaire
Que de luench chooureilhavo et s'afflatavo gaire.
— Eh bèn! li crido, as poou de yeou?
Ti duvi la vido, après Dieou,
Jamais t'oublidarai; vène èici que t'embrassi!
— Noun, fet lou Garri, ti fau graci
De ta recounèissenço, as troou l'èr generoux: