Télécharger au format pdf (2,6 Mo)

Douis moussus de la memo villo
Avien un sort bèn differènt:
Un, qu'èro fouesso riche, èro fouesso ignourènt
(D'aquelis nen a tant que si coumptoun pèr millo);
L'autre èro paure, mais sabènt:
Aquo probo, lou plus souvènt,
Que la scienci es cavo inutilo
En aqueou qu'aimo que l'argènt.
Dins l'houstau doou richas lou paure demouravo,
En descendèn doou cèou istavo au premier cous;
Viviet de pan mejan, buviet d'aigo doou pous
Et quand aviet rèn... esperavo.
L'autre d'aquo souvèn risiet;
En lou rescountran li disiet:
— Que vous sèrve d'aver lou naz dedins un libre,
Tout lou franc jour de Dieou, lou sero et lou matin?
Digaz-mi qu es vouestre destin?
De touis vouéstrèis moumens n'avèz pas un de libre;
Trabailhaz lou jour et la nuech,
L'esticou sènso frescour et l'hivèr sènso fuec.
Se cresèz coumo aquo d'acampar d'impourtanço
Dedins vouestre pays, vous troumpaz rudament.
Segur que l'industrio et lou gouvèrnament
Aurien ben pichouno esperanço,
S'avien que de gèns coumo vous.
Fèz d'esperiènçis phusiquos;
Estudiaz lèis mathematiquos;
Eis sabèns dounaz rendèz-vous...
Aquoto es bèl et bouen, mais d'argènt, n'avèz gaire,
Et souvènt n'avèz ges; pamens es lou milheou:
Aussi, siaz pas troou bouen pagaire!
Un home d'impourtanço es yeou,
Yeou que tout lou mounde caresso,
Qu'ai chivaus, carrossos, méstresso,
Boueno taulo, fouesso envitas,
De libres à couffins, bèn que lèis liegi pas.
Vèz, mi fèz tressusar quand mi parlaz dèis sciencis;
Voou mies un sac d'escus que tant d'esperiencis.
Sur d'aquo lou paure savènt
Aviet pres lou parti de rire
D'aqueou gros globou plen de vènt;
Car nen auriet fougu troou dire.
Mais la guèrro venguet dedins aqueou pays;
Quauquèis despartamens fougueroun envahis;
L'ennemi brulet tout, pilhet, fet cènt ravagis.
Lèis douis moussus s'en van à la gardi de Dieou,
Un eme sèis talènts; l'autre en disèn adieou
A soun bèn, à soun or, à sèis bèous aquipagis.
Alors si viguet lèou ce qu'èro lou milheou:
Lou lettru gagnet fouesso et faguet boueno mino;
Enterin l'ignourèn mouret de la famino.
Dins lèis tèms mauherous de la Revoulutien,
Aquo s'es vist souvènt: dedins l'emigratien,
L'home qu'èro pas sot jamai rèn li manquavo;
Lou darud fasiet privatien...
Laissaz bramar lèis ais, la scienci es boueno cavo!