Télécharger au format pdf (2,6 Mo)

Ma poustagno sera fenido.
Mais, Dieou t’en garde de parlar!
Lèis vesins mi dirien galino;
Sabes qu`an la lingo malino;
Si trufarien de yeou et lèis fariam chalar.
Nanoun proumettet bèn de va pas decalar,
Mais pas plus lèou vis pouigne l'aubo,
Saouto au soou, si passo uno raubo
Courre enco de tanto Goutoun
Et li dis: — Ha! boueno vesino,
Ai sur lou couar un gros coudoun...
Mais pouedi pas parlar, car moun home bousino;
Voou pas que digui qu'a fach l'uou.
— Un uou! — Voui, qu'es gros coumo quatro.
Anuech fasiet lou diable à quatre,
Et reguignavo coumo un muou.
Va dieou qu'à vous, boueno Coumaire;
Parlessiaz pas, mi fariaz quauque affaire,
Moun home mi tuerie. — Anem, n'aguèz pas poou,
Li respouende Goutoun, es pas lou premier cooup
Que m'an dich de secrèts, Nanoun, sieou pas pachoquo.
N'en dirai rèn, segur; vous juri davant Dieou
«Que se quauqu'un va sau, va saura pas de yeou...
(Goutoun li battiet la barloquo.)
Nanoun aviet à peno intra dins soun houstau
Que l'autro courre à la carriero
Countar la cavo à sa maniero
(Car la lingo li fasiet mau).
Dis: — L'home de Nanoun vèn de faire un fau gèrme.
Et recoumando lou secrèt.
L'autro proumette, et crac, va racountar lou trèt
En dian qu'a fach l'enfant que n'èro pas de tèrme.
Un autro dis que l'a fach vieou:
Et toutis: — N'es qu'àvous, Coumaire, que va dieo!
De coumaire en coumaire, au bout de la journado,
Disien qu'aviet fach bessounado,
Et puis lou voulien aubligear
A lèis far touis doux bategear.
LOU CHIN QUE POUARTO LOU DINA DE SOUN MÈSTRE
(Le Chien qui porte le dîner de son maître)
Milord pourtavo èis dènts lou dina de soun mèstre
Bèn èisigat dins un panier.
Un autre Chin, passan, li vèn de pèr darnier
Et li dounu un gros escaufèstre,
Car vouliet mangear lou fricot
En li fasèn pagar l'escot.
Eou qu'èro un Chin fidèou, que jamai rèn grugeavo
Sur lèis bèns que l'avien fisas
(N'èro pas raço de gusas);
Vesèn qu'à soun entour lou voulur roudejavo,
Si reviro, pauvo soun fai,
Et vous l'assipo uno voulado
De cooups de dènts, de cooups d'ounglado;
Car èro proun gailhard pèr faire aqueou trabailh.