Télécharger au format pdf (2,6 Mo)

A Moun ami Crousillat
LEIS DOUIS GARRIS
Fablo d'Horaço
Lou paùre Garri greù dins sa caùno, pecaire,
Autrèifes counvidet soun farlouquet counfraire,
Lou Garri de la villo: èrount sòcis d'antan.
Bèn qu'estrachan, groussier, pamens lou bastidan,
Quand li veniet quàuqun, quichier vo bèn quichièro,
Li fasiet bouèno caro et pereù bouèno chièro
Autant bèn que poudiet, car èro pas coussu.
Adounc, per regalar soun ami lou moussu,
Souarte seis prouvisiens: de ceses, de pranilhos,
De civado: en un mot, fouèsso maigros mangilhos!
Puis un rouigoun de lard qu'aviet soubrat d'ahier.
En variant vouliet regoustar l'hoste fier
Que, fiquous, tout beou just doou bout dèis dènts, ratavo
Un vieoure descourant: entantou qu'eou rouigavo
Lou cardoun et lou juilh, coucha dins un cantoun,
Per leissar la pitanço en aqueou groumandoun.
A la fin lou patet li fa: — Mais, cambarado,
Que plesir trobes dounc dins ta vido esmarado?
As patienço d'istar sur d'un bauc, dins un bouesc!
Aimaras mies la villo et leis homes, se voues
Venir vèire lou mounde et tout soun avantagi;
Vène, laisso ta cauno et toun roucas sauvagi!
Ami, tout ce qu'es vieou n'a qu'un tèms bèn coumptat;
Que siet grand vo pichoun, degun es exemptat
De la mouart, adounc faut bèn emplegar la vido;
Es que troou courto, anèm, la faguèm pas marrido!
Aro que pouès, jouisse eme leis gènts countènts;
Bessai dins quauquèis jours l'y series plus a téms.
Estou resounament mountet bèn tant la tèsto
Doou paure Garri fèr, que, d'uno cambo lèsto,
Sautet fouèro doou trauc coumo un pichoun lapin,
Et nouestreis vieilhs amis subran fèrount camin.
Envejous d'arribar, fouliet veire estèis Garris
Coumo anavount couchous! Quand siguèrount èis barris,
Ero soulèou tremount. Passount d'un pichoun trauc,
Et, sur la negro nuech, intrount dins un houstau
Deis plus riches: l'aviet de tapis d'escarlato,
De liechs de vori blanc... basto, tout ce que flatto
Lou goust deis gros richas; puis, dins mai d'un gourbin
Atroubèrount perèou leis soutros d'un festin
Que s'èro fach la vèilho. Alors, sènso mau traire,
Lou Garri citadin fa couchar soun counfraire
Sur d'un superbe liech, mounte si poout chalar;
Après, pèr lou sèrvir, pèr lou bèn regalar,
Courre, va, vènt, l'adue de carn, de groumandisos,
Et va tasto avant eou per pas far de soutisos.
L'autre, en se mitounant, groumandegeavo, hurous
D'aver changea soun sort per un sort tant courous,