Télécharger au format pdf (2,6 Mo)

Disiet, plen de mourbin; mais pèr quinto resoun
Dieou ti laisso dessus la terro?
Fariet mies, d'un cooup de tounerro,
D'embrigar lèis raços d'infèr
Qu'empouisounoun la terro et l'èr:
Alors, bessai, pèr yeou lou souen seriet poussible.
Ensin dis l'Home troou sensible:
Pèr aqueou dalicat tendrin,
Que la mousselino loublesso,
Lou drap de sedo es pas proun fin,
La tarlatano es troou espesso;
Eis mendros pichounèis doulours
Si lagno et si marfounde en plours.
Voudriet que touto la naturo
Courresse pèr lou secourir...
Vis pas, la pauro creaturo,
Que siam èissavau pèr souffrir!
(Les Femmes et Le Secret)
LÈIS FREMOS ET LOU SECRÈT
La Fontaino a dich dins soun libre
Que rèn peso tant qu'un secrèt.
Pusque lou sentiment es libre
Yeou diou qu'es pas verai (hèn que siègue à regrèt).
L'a rèn de plus loougier: se li durbès la pouarto,
Adessias! lou diable l'empouarto,
Et siaz segur que revèn plus,
Car pèr s'entournar sau pas l'us.
S'aumens lou rapourtier, quand destapo uno cavo,
Vous la countavo
Bèn tallo qu'es,
Passo, encaro; mais cado fes
Que redis quauquarèn fau sempre que v'aumente,
Et parlo jamai que noun mente.
Se sabiet coumo fa de mau,
Souvènt gitariet de lagrèmos...
Et de segur es lou defau
Autant dèis homes que dèis frèmos.
Pèr saupre se la sieouno èro bargeaquo ou noum,
Un home, dins la nuech, crido:
— Ai! quinto couliquo!
Lèvo-ti lèou, boueno Nanoun,
Oh! que malandro diabouliquo!
Dins moun ventre ai quauque demoun.
— Ha! moun Dieou, qu'es eiçot? m'estrasso...
Velaqui, velaqui que passo...
Es un uou.., qu'ues que va crèiriet!
(L'aviet boutat lou sero eou-meme dins lou liech.)
Esfrayado, Nanoun dis, en plourant de lagno:
— Ha! Signour, que gros uou de gau!...
Mais se nen fas uno poustagno,
Bèn segur toumbaras malaut;
Vau courre au medecin. — Noun,noun, l'home li crido,