Reinié SAVOYE - Université de Provence

LINDAU
Estent pau jougadou e gaire cafetié,
Emai prengue plesi au bacèu dis estanco,
Vite las d'ista dre à bada la petanco,
Subretout quand i'a trop de court e de coustié;
Desempièi proun de tèms ai pres pèr abitudo,
En douço coumpanié de dono soulitudo,
Me tirant à despart, d'enrega lou camin
Que mounto dins la colo, à l'oumbrino di pin;
E lande dins Calès, l'antico ciéuta morto
Qu'escound tant de secret embarra dins si porto;
Calès, que li Ligour, nòsti vièi davancié,
Iécavèron, antan, sis oustau roucassié;
Alor, lou cabedèu di siècle transitòri
Debanant davan iéu quatre milo an d'istòri,
Sente dintre moun cor pica lou batedis
Que fai à la chut-chut l'amo de moun païs;
E quand, i ventoulet alenant dis Aupiho,
Li grand pin manounen boulegon si mantiho,
Oublidant tout-d'un-tèms lagno, soucit, charpin,
Acorde mi pantai au murmur de mi pin.
BELLO DE JUN
Sus lou lindau de la bastido,
Pausadis e countemplatiéu,
Vese veni, d'argènt vestido,
La proumiero niue de l'estiéu;
Soun raro e palo lis estello;
De Roco-Rousso, vers Seloun,
De tout soun flar, la luno bello
Nego li mourre e li valoun.
Gardian de granjo alin perdudo
En quauque rode dóu trescamp,
Dins l'amplour de la soulitudo
Se respond lou japa di can.
Mai, au contro, sus la grand-routo,
Dóu gros trafé, l'esbrandamen
Que tout-esca l'emplissié touto,
Vai d'à-cha-pau à mourimen.
Repepio sa cansouneto,
Dins sa cauno, lou grihet brun;
Souto li mento, uno luseto
Esbrihaudo un caire d'oumbrun;