LEI TROUBAIRE MARSIHÉS Obro deis Encian, un Eissame de ...

Veici coumo va dien: Un jour de grando fèsto,
Lou cura brancassian, qu'a foueço de renoum,
Voulènt de soun avé, fa rintra dins la tèsto,
Un grand mistèri sant, si servé d’un sermoun.
— Meis enfant, li digué, vous, qu'emé counouissenço
M'avès toujour coumpres; vous qu'emé carita,
M'avès toujour segui dedins la penitenço,
Voueli, vuei, vous parla de la divinita...
La santo Trinita, que la glèiso nous douno,
Es un mistèri grand, persounificacien
Dóu Diéu d’umilita pamens en tres persouno,
Vous la vòu esplica, fes li bèn atencien.
E subran su d'acò, pèr servi d'estiganço,
Lou pastre dóu troupèu ti souarte d'escoundoun
Uno fourco de bla, sorto de maniganço,
Que devié desmouestra lou sèn de sa resoun:
Mei fraire, vesès bèn aquelo unico branco;
Es facho d’un moucèu, e pamens, coumo iéu,
Aremarcas qu'au bout si finis en tres ranco,
Ce que l'empacho pa de n'èstre qu'un fustiéu.
Ansin la Trinita, nouesto bello esperanço,
Coumpousado, vai di: — Paire, Fiéu, sant Esprit
Es coumo aquéu fustiéu, uno santo alianço,
Pèr bèn vous ensigna de crèire au sant Escrit.
Aguèn parla, lou prèire à tout soun auditòri,
En guiso d'oremus douné benedicien,
Au bestiàri fidèu que, pres d'un languitòri,
S'escampé su la plaço en milo reflecien.
Rescountreron bèn lèu lou brave e sant ermito
Que venié, tambèn èu, d'entendre lou cura:
— E bèn, que n'en disès, vous que sias un levito,
Nous semblo qu'es counfus, devrias nous esclera.
— Escoutas, respouondé noueste jouious arlèri,
Lou curat es bounias, li manco pa de couar;
Vòu pareisse savent, si crèi faire l'empèri
Emé soun esperit, mai crèsi qu'es pa fouart.