LEI TROUBAIRE MARSIHÉS Obro deis Encian, un Eissame de ...

Mistoulin.
Loueis BRUN.
EI CUOU-COUSU
L'amour, dien qu'es un marrid mau;
N'en mouere mai d'uno fiheto
Tròu braveto,
Que si dessecon dins l'oustau
E s’en van, à la flour de l'iàji,
Sènso avé tasta dóu mariàji...
Mai, pamens, perqué tant soufri;
D'amour, si duvrié pa mouri!
Pèr mèji l'a lei calignaire
E lou... remèdi couesto gaire.
L’AVUGLE
Vous farias enca mai de bilo,
Es pa toujou cavo facilo
Cadun de vougué countenta;
Es coumo se venias canta
Marbrou su La frumo Sensiblo,
Daou temp qu'aqueou d'aqui vous siblo
Un er qu'a l'er entre dous er,
Lou mandarias à Lucifer.
Counoueissi dins uno famiho
Coumpousado de quatre fiho
E de tres garçoun per lou men,
Touti basti gaihardamen,
Un avugle, l'einé dei fraire,
Que pourrias vira de que caire
Per trouva quaoucun mens inquiet.
Aqueou bourreou su tout disié,
Subretout quand eroun à taoulo:
S'en degaihavo de paraoulo.
Per manja n'avié jamai proun;
A sei fraire senso resoun
Foulié que cerquesse garrouio
En diant qu'èro que de frapouio
Que li fasien faouto de pan
Per fin que crebesse de fam.