LEI TROUBAIRE MARSIHÉS Obro deis Encian, un Eissame de ...

— Ma dametto!
(Cridé l'aoutre Babi encagna
Que toundié la pichouno chino,)
Ah! maladetto de canino
La Cagna morde! — Que, Cagna!
Ti siès pougnu'mé tei cisaiho
Li digueri. Regardo ben,
E la chino ti dira ren
Se li fas pa quaouqueis entailho.
— Hè, Moussu! dis l'ome oou mooutoun.
Lei moustacho faou-t-i lei faire? —
Fai-li lei, m'arregardo gaire;
M'es egaou de touto façoun.
E li vireri mai l'esquino.
Es per avé dès soou de mai
Que dis que mouarde. Es pa verai!
L'escoutès pa bello vesino.
Puei, quand mume l'aouriè mordu;
Anas! La peou es pa de veire,
Poussara mai. Vè, lei toundeire
Es de drôle d'endividu.
E, vesen que ma Coouquihado
Suiviè senso faire estampeou
La tirassièro doou bateou,
Prengueri la grando largado.
Fasieou fuè dei quatre cantoun,
E mei brulot mettien en flammo
Lei sabord de ma jouino damo;
Mai, lou Babi doou chin mooutoun
Vengué mi coupa la sibletto:
— Vè, Moussu! digué lou bachin,
Es feni de toundre lou chin,
L'aven fa la grando toiletto. —
Paoure chin! l’avien adouba;
De soun ventre, de sa cadeno,
Si vesié plus que la coudeno;
Eou! qu'avieou vis tant ben raouba.
En fèt de peou, ren li restavo
Que la moustacho e leis aneou;
E su lou su, coumo un drapeou
Lou ribau roso floutejavo.
— Es cinq franc, mi dis lou bachin. —
— Cinq franc e paguès pa patento?
Reprengueri, ti fas de rento
En toundent tres vo quatre chin.
— Faou paga, rebequé lou babi. —