LEI TROUBAIRE MARSIHÉS Obro deis Encian, un Eissame de ...

Metteri la barro su d'ello
Per renifla sei coutihoun.
Fe de Dieou! èro poulidetto!
Frissoulado coumo un agneou,
Vivornetto coumo un cadeou,
E sei nipo sentien l'ambretto.
Quand lou vent boufo doou bouen bout
Sieou pa long à carga la vèlo;
Farieou tremouela leis estèlo
Se jamai eri marabout!
Adoun, la bouco enfarinado,
Cercavi un sujet d'entretien
Per intra en counversatien,
Mai ma lingo s'èro nousado.
Hurousamen qu'un chin moutoun,
'M'un riban roso su l'esquino,
Arribé per senti la chino,
Coumo sentieou lei coutihoun.
Un bachin à facho d'arlèri,
M'uno casquetto su lou su,
Mi dis: — Lou faou toundre, Moussu?
Coumo voudrès, li respoundèri.
E vaqui qu'aganto lou chin,
Doou temp qu'un aoutre, de sei braio
Souarte un long pareou de cisaiho
E li fa toumba soun beou crin.
La damo, que senso ren dire
Avié segui lou mouvamen,
Mi dis: — Moussu! moun coumplimen!
E parté d'un escla de rire...
Rigueri em'élo, charrerian
De Chichois de la pastouralo,
De Zola qu'es à foun de calo
E de Dreyfus lou galerian.
En visen que mei galejado
La fasien pa troou esfraia
Assageri de m'estraia
E tireri quaouquei bordado
Dins aqueou temp, nouestei bachin
Fasien toujour marcha lei lamo;
E ieou, din l'esprit de la damo,
Visiou que fasieou de camin.
— Li fasèn lei quatre manchetto? —
Mi demando lou Ginouves;
M'es égaou, fès ço que voudres,
Li respounderi.