LEI TROUBAIRE MARSIHÉS Obro deis Encian, un Eissame de ...

Sera gaire bouen qu'à reçubre
De pichot bastimen de subre.
Leis ilo plantado aou mitan
S'arraparan de chasco man
E s'armaran coumo en famiho
Per la defenso de Marsiho.
Figura-vous quinte aparei:
La grando rado emè soun quei
Van deveni nouesteis areno;
Si quiharen su leis enteno
Per veire targa lei veisseou
Gai e laougiè coumo d'aouceou.
L'Indo, Suez, Aleissandrio,
Coumo un camin de la patrio,
Amenaran dins nouestei port
Milo nacien e sei tresor.
Uno intrado mounumentalo,
Uno nouvello Porto-Gallo
Si veira coumo encienament
Su la façado doou Pounent.
Es alor que la Canebiero
S'apelara la Grand'Carriero
E que va sera tout d'arret,
Dei Catalan finco à Jarret,
Fasent la nico à sa rivalo,
A la carriero Imperialo.
De moun pantai vaqui la fin.
Pregarai Dieou sero e matin,
Encaro mai s'un coou trespàssi,
De vouguè mi faire la gràci
De reveni dins dous cens an
Per veire se toùti lei plan
Forja per d'ome de genio
Soun esta digne de Marsiho.
FIN
*