LEI TROUBAIRE MARSIHÉS Obro deis Encian, un Eissame de ...

V. Valentin (lou sant-Janen).
Pèire Mazièro.
Despuei lou jour qu'es èsta rèire
N'en es countent mai que jamai.
PESCADOU DE LA CANÈTO
Su lou bord d'uno peiro plato
Em'un canihoun à la man.
Un moussaiot senso sabato
Espèro lou pei en badant.
Sa facho bruno e mistoulino
Si miraio dedins la mar;
Lou blu de l'oundo si devino
Dins lou reflet de seis uei clar.
Tout à l'entour de sa canèto,
Vis proun fura de pei foulet:
Aourado, bogo e galinèto,
Rascasso, sarran e moulet.
Mai la peissaio, en tirant l'esco,
Leisso de caire lou musclaou...
Paoure pichounet, de la pesco
As bessai pancaro la claou?
Noun, de bado, saoup que la scienci
De pesca, senso estre un nitard,
Es d'avé foueço de pacienci,
Que lou pei pito leou vo tard.
Esco mai sa lenci, pecaire,
Engaoubia, d'un er plan-planet,
Emé lou salabre d'un caire,
E de l'aoutre lou coufinet.
Quand anfin gobi vo girèlo
An pita, n'en es cremesin
D'uno joio toujou nouvèlo,
E lou rei es pa soun cousin.