LEI TROUBAIRE MARSIHÉS Obro deis Encian, un Eissame de ...

Puei, li moustrant sei man, sei pèd,
Li dis: — Mi mànques de respèt!...
Quand decendèri su la terro
Tout lou mounde mi fè la guerro;
Mi clavelèroun su la crous!
Soufrèri coumo un malurous!...
Coumo jùgui pa de moum resto,
N'ai proun d'un coou d'agué fa l'ai,
Ai jura, despuei, su ma testo
Que jamai plu li decendrai!...
Mai lou Sant-Esprit, en couloumbo,
Pourrié toumba, coumo uno boumbo,
Su la testo dei maoufatan
E leis estermina subran!...
Raiouno aou temple de memòri
Mè lei valent cubert de glòri,
Counto-li toun enfetamen,
E lou veiras dins un moumen.
Ti segui dins la Santo vilo;
Es dit, ti fàgues plu de bilo.
En efet, l'Esprit-Sant,
Pren sa man dins sa man,
Bras dessu, bras dessouto,
Em’eou si mete en routo.
Troùvoun Sant Peire à soun portaou,
Doou ciele es eou que tèn la claou,
Tout en si fent duerbi la pouarto
Li fa: — Fan de misèri fouarto
Aou Papo, qu'es toun sucessour;
M'en vaou adabas faire un tour
Per li desbrouiha soun afaire;
Acò, moun beou, mi couesto gaire
E d'aqueou pas voou v'empacha.
Lou Sant li dis: — Sieou ben facha
De ti veire juga ta vido!...
La casso, eilabas, es duerbido!...
En viant, dins l'èr, un gros aouceou
Ti prendran per un estorneou,
E d'un coou de fusieou, pecaire,
Mourras de la man d'un cassaire!
— Mai s'es ensin voou pa pu lun!...
E pamens, vè! foou que quaouqu'un
Vague releva soun prestigi!
Sant Peire, siès aqui, ti pigi!
Lou Papo va ti racounta
Ce qu'espero de ta bounta!...