LEI TROUBAIRE MARSIHÉS Obro deis Encian, un Eissame de ...

Sabes pas? Margarido es grosso;
Se Dieou voon que siegue un pichoun,
Mangi siei fran! Se n’a pas proun,
L'ajustarai ma semanado.
Per ieou qu'unto bello journado!
Mai mi manco per lou moument,
Afin de mi rendre countent,
Un peirin. Quant à la meirino,
Ma suer einèio, Catarino,
Si cargo de lou fa chrestian.
Emé l'ajudo d'un fenian
Aourai trouva tout moun affaire.
— Toco aqui, serai toun coumpaire!
— Li comti! — Va ti dieou, n'a proun.
Puis intrerian dins un bouchoun
Per ensemble touca lou veire.
Proumeteri de lou reveire
Lou lendeman à soun oustaou;
Mai sa femello agué lou maou
A mie-jour, en manjant d'amouro.
Lou meme soir, su lei set ouro,
Soun ome vengué mi souena.
Ren de plus pressa que d'ana
Veire tout ce que si passavo.
Per bouenhur que tout ben anavo.
La coumaire avié fa l'enfant.
La coumplimenteri subran,
E fiserian per Sant-Truphemo
La celebracien doou batèmo.
Sant-Truphemo èro adavan-sier:
S'aguessias vi coumo èri fier
Souto lou bras de Catarino!
M'èri mes la longo faquino,
Mei soulié noou, moun capeou blanc:
M'aourien pres per un negouciant
Doou plus beou quartié de Marsiho.
A ma bouco avieou la cassio
E la cigaro de Java:
Macareou, coumo èri gava!
Lei femello mi relucavoun;
Toutei leis ome remarcavoun
Lou bouen er qu’avieou en marchant;
Cadun disié: Qu'es lou marchand
Que l'a tant ben pres la mesuro
Aqueou si! qu'a boueno tournuro!
A ges de lien, double dieou!