LEI TROUBAIRE MARSIHÉS Obro deis Encian, un Eissame de ...

Aou noum doou paire emé doou fieou,
E doou pijoun ei blanqueis alo
Qu'inspirara nouesto mouralo,
Dei peca desbuien lou fieou:
Viguen l'orguei, aqueou troumpaire,
Que nous fa veire tout en mies,
Vous a pa boustiga lou pies
Quaouquei fes per cerca de plaire?
Vouei, parai! aco mi sufi,
Sabi que quand sias tant pinpanto,
Tant poulido e tant agradanto
Poudès pa vous faire counfi.
Passen aou peca d'avarici,
Es un peca qu'es un paou fouar,
Perqué de douna voueste couar,
Quand sias bello es ren que justici.
Foudrié pa vous douna pamen,
Lou cas si trovo proun bizarre,
Es clar que n'en serieou avare,
S'un beou jour devenias moun ben.
Diferentamen si pleidejo
Lou pecatas deis envejous,
Quand s'agisse deis amourous,
Proun souven manco pa d’envejo.
Coumo va vias, sieou indurgent,
Per l'envejo, sieou Jean Trepasso,
Sabès l'envejo que si passo
Dins ieou quand si trouvan ensen?
Sias envejoué d'un calignaire,
Jouine, pouli, galant, parai?
Diguessias pa qu'es pa verai,
Aoutramen n'en mourrieou, pecaire.
Aro sian à-n-un pecatoun
Que li dien crèsi la lussuro,
Coumo sias panca ben maduro,
Lou passaren... e per resoun.