LEI TROUBAIRE MARSIHÉS Obro deis Encian, un Eissame de ...

Pèr dire au Cabanoun
La Verita
Dirés que siéu qu'un vièi renaire,
Que quàsi jamai siéu countènt,
Que jamai rèn m'a pouscu plaire,
Que siéu qu'un gus, ome de rèn.
Mai siéu fourça d'agué de lagno,
En vesènt tant de fausseta,
E tant de feiniant qu'an la cagno
Pèr dire un mot de verita.
Es d'ome sabènt, o, v'atèsti,
Pourrien èstre ome de bèn
Mai soun touca, vo fan la bèsti,
Fan l’ase pèr agué de bren!
L'a de membre à l'Academìo,
Que sei discours mi fan susa.
Desounouron la pouësìo,
Car dien pa'n mot de verita.
E lei deputa, quet pratico!
Anas, soun fouart, sabon parla,
Mai ce que dien vau pa'no chico,
Barjacon autant que d'avoucat,
Quand discuton de poulitico.
Dirias qu'es tout d'ome sena,
Si fouton de la Republico;
An jamai di la verita.
Si fan passa pèr patrioto,
Tóuti va bramon mai que mai,
Subretout lou jour que si voto,
Mai prènon lou pople pèr d'ai.
D'éli, de bèu van à l'egliso,
Pèr fin de miés nous engana.
Mai tout eiçò n'es que bestiso,
Car l'a pa’n brout de verita.
Quouro vendra la bello annado
Que saren tóuti bèn d’acord?
Que dóu bounur veiren l'aubado
Pèr fin d'abouni nouaste sort?