LEI TROUBAIRE MARSIHÉS Obro deis Encian, un Eissame de ...

T. Aubanel
Quand, dins la tempèsto de Mars,
Li bèsti, coume d’alumard,
Endihon d'amour fòu, chatouno.
Passes plus, que me fas mouri…
Vole pas, vole plus t'ama!
M'es en òdi de trelima
Pèr tu tant bello e tant marrido.
Te crèignes pas tant. Esperido,
Brèu de car roso e de péu brun,
Que poudrié, moun poung, metre un frun
Coume uno mouissolo! Chatouno,
Passes plus, que me fas mouri...
La niue fau d'estràngi pantai:
M'escapes autant lèu que t’ai;
Te courre après, jamai t’ajougne.
Vese de liuen bada toun jougne
Coume uno flour que s'espandis:
Sèmpre, quand toque au paradis,
Un diable te raubo, o chatouno
Passes plus, que me fas mouri...
D'abord qu'en terro noun se pòu
Estre amourous sènso avé pòu,
Anen-nous-en dins lis estello;
Auras lou trelus pèr dentello,
Auras li nivo pèr ridèu,
E jougarai coume un cadèu
A ti pichot pèd, ma chatouno!
Passes plus, que me fas mouri,
O laisso-me te devouri
De poutouno!
*