LEI TROUBAIRE MARSIHÉS Obro deis Encian, un Eissame de ...

LIPETUN
La Venus d'Avignoun
Pèr marca lou centenàri dóu brihant pouèto Teoudour Aubanel, avèn agu
l'autourisacien touto particuliero de soun enfant Jan Teoudour-Aubanel de publica
La Venus d'Avignoun, aquelo perlo que tiran dóu beluguié dei Fiho d'Avignoun, “
veritable escrin de pèiro preciouso, ounte nosto Prouvènco, quand voudra se faire
belo, à bèl èime pòu pesca. ” La Pignato e sei leitour fan sei gramaci à l'amistous
Moussu Jan Teoudor-Aubanel.
Sis iue d'enfant, founs e verdau,
Si grands iue pur vous dison: Dau!
Un pau risènto, un pau mouqueto;
Tèndri, se duerbon si bouqueto;
Si dènt, pu blanco que lou la
Brihon... Chut! qu'arribo: vès-la!
Tout-just s'a quinge an, la chatouno.
Passes plus, que me fas mouri,
O laisso-me te devouri
De poutouno!
Arrage soun péu negrinèu
S’estroupo à trenello, en anèu;
Un velout cremesin l'estaco;
Fouita dóu vènt, de rouge taco
Sa caro bruno e soun còu nus:
Dirias qu'es lou sang de Venus
Aquéu riban de la chatouno.
Passes plus, que me fas mouri,
O laisso-me te devouri
De poutouno!
Oh! quau me levara la set
De la chato?... A ges de courset:
Sa raubo, fièro e sèns ple, molo
Soun jouine sen que noun tremolo
Quand marcho, mai s'arredounis
Tant ferme, que subran fernis
Voste cor davans la chatouno.