LEI TROUBAIRE MARSIHÉS Obro deis Encian, un Eissame de ...

Jan dóu Vidourle
LA GUÈCHO
Quand lou garçoun de La Faroto
Siguè lest à se marida,
Sa maire, pèr lou decida,
Ié digué: — Moun brave Peiroto
Te dounarai ço que voudras,
Lou jour meme ounte espousaras
La galanto e bello jouvènto,
Agradivo e tant avenènto,
Que t’ai chausido e sout la lèi
D'aquéu verai moussèu de rèi
Seras urous, n'en siéu seguro.
Es moudèsto, amablo emai puro,
Es pas d'aqueli ris-quand-plòu,
Sènso coumta qu'a proun de sòu.
N'en troubaras pas la pariero,
Car es uno bono oustaliero,
Prèsto à-n-adurre à toun fougau
Lou bonur, la pas e la gau.
N’en fan plus; s'es roumpu lou mole!
Voles saupre, moun brave drole,
Quau es aquel aucèu tant rar,
Qu'à moun dire, à tant de desar:
Es la chato de Verounico,
M’anes pas faire de rebrico,
E respond-me bèn francamen
Se t’agrado efetivamen.
— Me plarié proun soun galant mourre.
Mai, siegue di sèns trufarié,
Me demande se me vèirié.
D'un uei regardo lou clouchié,
E de l'autre la vièio tourre!
*