LEI TROUBAIRE MARSIHÉS Obro deis Encian, un Eissame de ...

Lou Faroun
Pèr dire au Cabanoun
Lou moumen mau chausi
Un jour, davans moussu lou mèro, (1)
Lou poulit Jan, la gènto Clèro,
Toui dous arrapa pèr la man,
L'un rede e fièr coumo Artaban,
L'autro pimparrado e lisqueto,
En si fasènt un pau bouqueto
Au noum de la lèi ausissien
Lei counsèu que leis unissien.
Coumo lou magistrat nousavo aquest afaire
Clèro, en si revirant, esmougudo, pecaire!
Entrepachado emé sei gant,
Troumbo, au sòu soun moucadou blanc
E pèr lou rabaia si clino, tèsto basso.
En la guinchant de l'uei, Jan que tèn plus en plaço,
Li vist boumba dins soun courset
Dous pichoun globe redounet
Que li fan mounta l’aigo en bouco...
Un gros rire lou pren, sarro lei brego, espousco.
— Pèr lou còup, fè lou mèro en s'issant bruscamen,
Siés marida e ti fa rire?
Paure agnèu, leisso-mi ti dire
Que chausisses mau lou moumen!
(1) Mèro, Clèro, counserva pèr la rimo. En bouan prouvençau faudrié: Maire, Claro.
Pèr dire au Cabanoun
Lei braio de l'Evesque
Perdounas-mi moun Diéu, aquelo galejado!
Un evesque de la countrado
Que si sentié, parèis, miés à taulo que dre,
Après'no bouano taulejado
Avié fa, dins uno embrouncado,
Peta sei braio au bouan endré.