LEI TROUBAIRE MARSIHÉS Obro deis Encian, un Eissame de ...

Tóuti di tien: Vous la souvèti bouano!
Pèr qu'au boussoun bèn lèu mandes la man.
Veici d'abord lou fatour de la posto
Qu'en t’estrenant d'un marrit calendié
Vòu mai la pèço, e dóu biais que t'acosto
Siés óublija de l'ana de vint pié.
Après ti vèn aquéu dóu tiro-grafo,
Ti lacho mai soun pichoup bounimen:
Santa, bouanur... e dóu biais que t'agrafo
Fau li lacha lou poupre entandóumens!
— Bouan an, moussu, siéu l'ome dei tineto!
Ti dis un autre emé soun teta dous,
Aquéu vòu mai aganta la peceto,
E pèr la prene a pas lei det merdous.
L'escoubihié, se vesias coumo troto
Pèr rabaia sa part de cagatroua!
Pèr ti saia, ti tira la garroto,
Coumo toujour ti la souvèto uroua!
— Toucas la man que siéu l'ome deis aigo!
T'arrambo ansin l'emplega dóu canau.
Aquéu vòu mai sa part de bourtoulaigo
Pèr ti leissa manca d'aigo à l'oustau.
Aquéu dóu gaz, que de gaz que counsumo!
Pèr t'esprima sei pus tèndri souvèt;
Es pas pèr rèn que soun esprit s'alumo,
Car es pèr miés alimenta lou bè.
Mai s'aquéu jour ti fas faire la barbo,
Cò dóu couifur siés mai rasa de fres,
Sus d'un platèu ti passon la rubarbo
E pèr casca, paure Boto, siés pres.
Se pèr malur rintres à la buveto,
Siés arramba subran pèr lou garçoun
Que poulimen t'óufro uno cigareto,
E ti fau mai cracha dins lou sietoun!
Oh! que de gènt que mandon la sardino
Pèr fin de prene un gros troun à l'arrèst.
L'a plus d'amour, l'egouïsme dóumino...
E tout si fa plus que pèr interès!