LEI TROUBAIRE MARSIHÉS Obro deis Encian, un Eissame de ...

Jan dóu Vidourle
Davans un vòu de badalas.
Semblavo quàsi uno baleno
Pesant quau saup quant de quintau
E n'en faguèron lou partage
Segound lou noble e vièil usage
Entre tóuti lis espitau.
Li journau de la Capitalo
Se soun bèn garda de counta
Aquelo pesco óuriginalo.
Pamens es bèn la verita!
Es un brave sarjant de vilo
Nebout de moun vesin Panfilo
Que de l'aigo la vist sourti.
S'èro aqui pourrié l'afourti.
Car aquéu matin, pèr ma fisto!
Se capitavo sus lou pont.
Après acò li journalisto
De tèms en tèms auran lou front
Quouro ié mancara de còpi
D'escudela de cancan tau.
Vau miés que se taison li tòpi:
Soun pas toujour esperitau.
Lou Pebrounié fa de quatrin
Lou Pebrounié es nouaste ami R. Bringer qu'a founda l'Escolo dei Pebroun à
Pierlato, en Tricastin. Es, d'aquéli que tirasson pas la malancounié! Escriéu, de
conte, d'istòri, de rouman en franchimand dins tóuti lei journau e n'en fa à paro lou
coufin! Mai gaubejo lou prouvençau tambèn, encaro miés que la lengo dei Souto-
Prefèt. Nous a manda douas dougeno de quatrin dins un casernet, que petejon
coumo un fue de cano!
La vido es courto, lis annado
Passon lèsto coumo lesert...
Pèr garceja 'no couiounado
Acò's bèn proun de quatre vers!
dis lou Pebrounié en guiso de prefàci. Voulès tasta sa marchandiso? Tenès, fès bouco d'aquéli: