LEI TROUBAIRE MARSIHÉS Obro deis Encian, un Eissame de ...

Nuvelone
Louis Tombarel
E quouro avié besoun de quaucaren de mai
Atalavo lou muou e s'en anavo à-z-Ais
L'autre dissate arribo à grando aluro
Em'ùni douge brès carga sus sa veituro
— Mai que faras d'acò, bougre de grand fada?
Diguèron lei vesino en lou veguènt passa.
— Fada?... va siéu pas tant qu'acò, vesino!...
Sounjas que l'a un mes que mi siéu marida
E ma fremo vèn d'acoucha
Dins un an, d'aquéu pas, n'en aurai douge au mens,
E vias, es pèr acò qu'ai fa la prouvesien.
LIPETUN
MA PIPO
Sèns ma pipo de brusc au canoun de bambou
Siéu res, rèn me fai gau, siéu marrit, siéu renaire.
O ma pipo, o ma fado, o perlo dóu troubaire
Que chale de tuba toun taba jusqu'au bout!
La pipo es un tresor. Iéu l'ai visto pertout,
I bouco dóu jouvènt e dóu vièi repepiaire,
Dóu riche feniantas, dóu paure travaiaire;
Mai es entre mi dènt que l’ame subre-tout.
Ah! se l'Antiqueta, li Grè dóu vièi Oumèro,
Se li latin avien pouscu saupre ço qu'èro
Un cachimbau bèn founs, bèn large e bèn lusènt!
Ouràci, ame à te vèire alounga sus l'erbeto
Pantaiant ti vers gai en chuchant la fuieto;
Mai te manco moun bèu, un cachimbau i dènt.
L. TOMBAREL, jouine felibre de Castèu-Reinard que mouriguè trop lèu, au bèu de
sa jouvènço, en 1896. Agué pas tèms de liga sis oubreto, rejouncho puei en 1899
pèr sis ami Contencin e Eymard d'Ais dins un libret de pïouso remembranço: Li
Toumbareleto.