LEI TROUBAIRE MARSIHÉS Obro deis Encian, un Eissame de ...

L'aoutro si sènte lei bouteou
Pessuga pèr un rababeou.
Dins l'enubriado e la furio,
Roùmpon lei veire e lei boutiho;
Eici ròton coumo de pouar,
Eila va fan enca pu fouart,
Ti làchon d'aquelei bordado
Que sènton pas la ginouflado.
Fiho emé nèrvi, senso poou,
Ben leou si radasson aou soou;
Es tout d'ami, tout de coulègo,
Si gàrçon de coou su lei brègo,
Si màndon la man de pertout,
Dirias lei chin de Jipoutout.
Aou mitan de cris e baloufo,
Entendès que coufo su coufo:
Aprè t'espesson lou vieouloun
Daou paoure ibrougno Cigaloun,
Ti mèton en troué la guitarro
Doou mesquinas Jigè Manarro,
E doou paoure avugle Leon
Estripaion l'accordeon.
Jamai s'es vis pariero loucho,
Lei vesin aguènt la petoucho
Pàsson uno marrido nué;
De la poou que gàrçon lou fué
S'en van cerca lou coumissàri,
Mai lei nèrvi li fan d'oouvàri,
A grand coou de marri coufin,
De banasto emé de gorbin;
Dessu lou nas li fan la nico,
L'estrasson touto la tunico;
E lou laisson, lou couele touart,
Entre la vido, entre la mouart.
Lendeman, nèrvi e nèrviasso,
Au tribunaou, la tèsto basso,
Davan lou jùgi d'instrucien
Fasien, pecaire, coumpassien,
L'aourias, aguent plu de nèrvio,
Tapa lou cuou m'uno lentiho.
Pamens, en si vian acusa,
Disien: fasian que s'amusa,
Viguen, qu'es que nous voulès faire,
Es un plesi de regalaire
De si manda de coou de poun,