LEI TROUBAIRE MARSIHÉS Obro deis Encian, un Eissame de ...

J. -B. Faure.
CARITA
Quouro souto lou vent que siblo,
Tramblon lei vitro à l'oustalot,
Sounjas ei brefouniè terriblo
Qu'en mar baton lei matalot.
Lou sèro, à la taoulo tranquilo,
Emè la famiho en soupant,
Sounjas ei gen que, senso asilo,
Mouèron faouto d'un troué de pan.
Pròchi lou fougaou ountè briho
A la vihado un pouli fuè,
Sounjas un paou à la paouriho
Que defouero passo la nuè!
S'apara de la frejo biso,
En vouaturo anas aou casteou,
Sounjas que n'a senso camiso
E partajas voueste manteou.
S'uno amo pico à vouesto pouarto,
Oh! li barras pa voueste oustaou,
Car deman la troubarias mouarto
Estendudo su lou lindaou.
Tristo e drudo la nejo toumbo
Su lou paoure que douarme aou soou,
E la terro sera sa toumbo
E la nejo soun blanc lançoou.
Riche, lou paoure es vouestre fraire,
Faire d'urous es agradieou,
L'aoumouarno es uno boueno afaire,
Qu douno aou paoure, presto à Dieou!
'Queou banquié fa jamai fahit
E couro lou moumen vendra,
Dins lou ciele ountè vous invito
Aou cent per un vous lou rendra!