LEI TROUBAIRE MARSIHÉS Obro deis Encian, un Eissame de ...

Lou Faroun
Grasset es bouan enfant, ni mouarde, ni grafino.
A puei pas tròu marrido mino,
Anen lèu s'estrema, si cerquen pas de mau,
E prendrès quaucarèn de caud;
Trempado coumo uno merlusso
Au cabaret de misè Luço,
Vous secarès davans lou fue,
Chimarèn dous det de vin cue;
Es lèu passa'n moumen de crento,
Anas, v'enanarès countènto.
— Nàni, cridè subran, encambant lou valat
E mi dispareissènt... restèri aqui, giela.
Quand fara brefounié, tèn ta barco amarrado
Mi pensèri, capot; qu t'aurié di, Grasset
Qu'uno femello tant bagnado
Ti respoundrié — Nàni tant se!
Lou Counseou tengu per lei Gàrri
Un gros gat, que sei mèstre avien, emé resoun,
Subre-nouma manjo-ratoun
Avié tant fa guerro ei boustre de roueigaire
Que de garri n’avié plu gaire!
E lei quaouqueis un que pecaire!
Avien saouva la peou dei griffo doou bregand
Sourtien plu de sei traou que quouro avien ben fam.
Escoutas, cadun tent à sa tristo vidasso
E sieou ben segu qu’à sa plaço
Mai d’un de naoutre aourié fa'nsin,
Pamen, aco d'aquit duvié prène uno fin,
Car, es pa besoun de va dire,
Vieoure d'aquelo sorto èro un crudeou martire.
Doun un jour que noueste couquin
Eme la gato doou vesin,
Ero ana faire lou gourrin,
Touti lei garri'ncaro en vido
Zou! fagueron uno sourtido,
E per decida quaoucarren
S’acamperon toutis ensen
Escoundu souto d'uno taoulo.